Kuultisiorfiup ammaqqinnissaanut nunatsinnit Danmarkimiillu aningaasaliisut
Nunatsinni piiaaffiit maanna marluusut pingasunngussapput.
Ingerlatseqatigiiffik Greenland Venture, Namminersorlutik Oqartussanit pigineqartoq Vækstfondenilu, danskit naalagaaffiannit pigineqartoq ataatsimoorlutik Nunatta kujataani Nalunami kuultisiorfiup ammaqqinnissaanut 15 millionit koruuninik aningaasaliissuteqarput.
Aningaasaliisut tusagassiuutinut nalunaarummi taama allapput.
- Suleqatigiinnerput aqqutigalugu Kalaallit Nunaanni suliniutinut ineriartortitsivissanullu atortussat pillugit aningaasaliisimaneq siulleq tunniunneqartoq pillugu pisortatigoortumik saqqummiussisinnaagatta nuannaarutigaarput, Greenland Venturep pisortaa, Karsten Højer oqarpoq.
AAMMA ATUARUK Kuultisiorfik Nalunaq ukiup naannginnerani matuneqassaaq
Venture Greenlandip Vækstfondenillu aningaasaliissutit avippaat. Tassa tamarmik immikkut 7,5 millionit koruuninik aningaasaliillutik.
Nunatsinni ineriartortitsinissamut aningaasaliisarnissamik qulakkeerutaasussamik marsimi 2019-imi isumaqatigiissuteqartoqarpoq, matumanilu millionilikkaanik aningaasaliineq aningaasaliisarnissani siulliuvoq. Isumaqatigiissut danskit naalagaaffiannit Namminersorlutik Oqartussaniillu aningaasaatinit 220 millionit koruunit tikillugit aningaasaliisoqarsinnaaneranut periarfissiivoq.
Suliffissat nammassinnaasumillu ineriartorneq
Vækstfonden naapertorlugu piiaaffiup ammaqqinnera suliffinnik pilersitsillunilu nammassinnaasumik sumiiffimmi ineriartortitsissaaq, tamannalu pillugu aningaasaateqarfiup aningaasaliineq nuannaarutigaa.
- Aatsitassarsiorneq qalluinerlu Kalaallit Nunaanni neriunaatilissuarnut ilaavoq. Aningaasaliinitsigut Nalunami kuultisiorfik pingaarutilimmik siuariartissinnaavarput, selskabilu tunuliaqutaasoq tunisassiornermut pilertortumik aallartitsinissamut piareersimavoq. Tamanna Kujataani ineriartornissamut siuariartornissamullu ilapittuutaassaaq, Vækstfondenimi pisortaq, Rolf Kjærsgaard oqarpoq.
Kuultisiorfiup akilersinnaannginnera pissutigalugu 2013-imi matuvoq. Aningaasatigulli unammillernarsimasut aningaasaliisut tunuarsimaassutiginngilaat. Piiaavimmimi qalluisoqartareermat atortussaqareerpoq, tamannalu iluaqutaassasoq aningaasaliisut isumaqarput.
Kuultisiorfiup qaqugu ammaqqinnissaa naatsorsuutigineqarnersoq tusagassiuutinut nalunaarummi allassimanngilaq.
KNR-ip Greenland Venture oqaaseqartinniaraluarpaa iluatsinnaguli.
