Kuultisiorfik Nalunaq ukiup naannginnerani matuneqassaaq
Nalunami piiaviup siunissaa ukioq naallugu pitsaanngitsutut isikkoqarsimavoq. Piginnittut akiligassaqarfimminnut ”standstill-imik isumaqatigiissut” akuerisariaqarsimavaat. Tamannalu pissutigalugu pisinerit tamaasa ingerlaannaq akilerneqartussanngortinneqarsimallutik. Kuultimut akigitinneqartut appariarujussuarnerisa kingunerisaanik kuultisiorfik siunissami amigartooruteqarluni ingerlasussanngorpoq. Tamannalu pissutigalugu piginnittut piiaavik matunialerpaat.
Allattoq Peter Troelsen, Simon Uldum
aggustip 28-at 2013 08:44
Piiaaviup matuneqarnissaa aallartisarneqarpoq, piiaanerlu septembarip naanerani oktobarilluunniit aallartinnerani unitsinneqassaaq, piiaavillu ukiup naannginnerani tamakkerlugu matuneqarsimanissaa naatsorsuutigineqarpoq.
-Kuultimut akigitinneqartut tassunga atatillugu pingaaruteqarluinnarpoq, akigititallumi uagut aqutarinngilagut. Akit ukiuni kingullerni marlunni aatsaat taama appasitsigaat, tamannalu pissutigalugu piiaavik imminut akilersinnaajunnaarpoq, Bob Bailey, Arctic Mining Ltd.-mi Chief Restructuring Officeriusoq nassuiaavoq.
