Nunatsinniittut Efterskolit pilerngunneqarluarput

Kangerlussuarmi efterskolernissaq soqutigineqarluarpoq. Immikkut ittumik efterskolertitsinissamut qinnuteqarfissatut killiliussaq naammat efterskolimi inissanut 80-iusunut 95-it qinnuteqarput.
Allattoq Elisa Isaksen
aggustip 11-at 2009 07:11

Maanna paasinarsivoq, Qasigiannguani Villads Villadsenip Efterskolianut utaqqisuni 61-iusunit 45-t Kangerlussuarmi Efterskolimi atualernissartik akuerigaat. Atuartut Kangerlussuarmi efterskolernissamut qujaannartut ilaat Villads Villadsenip Efterskolianut utaqqisuniiginnarusupput ilaallu ilinniakkamik allamik aallartitsiniarlutik.

Atuartut Qasigiannguani utaqqisuniissimasut Kangerlussuarmi salliutinneqassapput, qinnuteqaatilli nalilersorneqareerpata tigutittussat itigartitaasussallu piffissami qaninnerpaami nalunaarfigineqarumaarput.

Ilanngullugu ilisimatitsissutigineqarpoq, ilinniartitsisut atorfinitsinneqartussat kingulliit atorfinitsinneqaleruttortut, sulisuulereersullu ukiumi atuarfiusumi atuartitsinissaq pilersaarusiorlugu aallartereersut.

Kangerlussuarmi efterskoli Villads Villadsenip Efterskoliata ataani immikkoortortatut ingerlanneqassaaq. Efterskolini marluusuni atuartitsineq septembarip 14-anni 2009-mi aallartissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq