Nunatsinniit Canadamut imaatigut kabeli ammarnersiorneqarpoq
Imaatigut kabelimut stationeqarfik Ineqarnermut, Attaveqarnermut, Angallannermullu Naalakkersuisumit Jens B. Frederiksen-imit TELE Greenland A/S-imilu siulersuisut siulittaasuannit Kaj Egede-mit pisortatigoortumik atoqqaartinneqarpoq. atoqqaartitsisineq Newfoundland-imut Labrador-imullu pisortatigoortumik tikeraarnermut ilaavoq.
Naalakkersuisunut ilaasortaq Jens B. Frederiksen oqaaseqarnermini oqarpoq
Europa-p Amerikkallu Avannaata akornanni Atlantikoq Avannaqqullugu attaveqatigiinnermi attaveqaatitigut siulliulluni nutaaliortarneq qangali pisareersoq tulluusimaarnartorlu Newfoundland-imi aamma Labrador-imi ingerlateqqinneqartoq.
- Nunat marluk akornanni kabelip optiskiusup niuernikkut periarfissanik nutaanik soqutiginartunik qanoq annertutigisunik nassataqarsinnaanera eqqoriarsinnaanngilarput takorloorsinnaanaguluunniit Jens B Frederiksen oqarpoq.
Tele Greenlandip siulersuisuini siulittaasoq Kaj Egede kabelikkut attaveqaatip atoqqaarfissiorneqarnerani ilaatigut oqarpoq
TELE Greenlandip imaatigut kabelip Milton-imut nunnigunneqarnissaanik toqqaanera pingasunik pissuteqarpoq: pingaartumik kabelit siusinnerusukkut siaarneqartartut amerlasuut tassunga nunnigunneqartarmata; tulliatut TELE Greenland tassunga nunnigussinermigut tassani najugallit attaveqaateqarnermillu suliallit pitsaasumik back-haul-imik (siumut utimullu attaveqarsinnaanermik) isumaqatigiissuteqarfigisinnaammagit; naggataatigullu Newfoundland-imi Labrador-imilu naalakkersuisuusut attavinnut sukkasuunut tunngasunik suleqatigilluarsinnaanissai periarfissaqarluarmat.
Imaatigut Kabel atorlugu attaveqaat 750 millioner koruuninik akeqarpoq, taannalu taaguuteqartinneqarpoq Greenland Connect 4,800 kilometerinik takissuseqarluni. Kabeli Islandimit tunu aqqusaarlugu Kalaallit Nunaannut attaviligaavoq tassaanngaanniillu kimmut New Foundlandimut attaveqarluni tassanilu ullumi attavik tassa atoqqaartinneqarpoq.
