Nunatsinni utoqqasaat arsaattartut Narsami ukiormanna pissartanngorniuunnissaat unitsiinnarneqartoq
Nunatsinni utoqqasaat arsaattartut pissartanngorniuunnissaat aningaasassaaleqineq peqataarusuttullu ikippallaarnerat peqqutigalugit taamaatiinnarneqarpoq. Narsami aaqqissuussisoq, timersoqatigiiffimmit N-85-imeersoq Josef Petersen, ugguarpoq.
ASS © envato
Allattoq Brian Jensen
juulip 01-at 2026 10:55
Nunatsinni pissartanngorniuttoqarnerani Timersoqatigiiffiit Kattuffiata aalajangersagaani, ikinnerpaamik eqimattat sisamat nalunaarsimanissaat piumasaqaataavoq.
Nunatsinni utoqqasaat silami arsaattartut Narsami pissartanngorniunnissaannik aaqqissuisoq naapertorlugu nalunaartut ikippallaarsimapput.
- Uggornaraluaqaaq tamatta pilerigaluaratta, Narsami utoqqasaanik arsartitsinermi aaqqissuisoq Josef Petersen oqarpoq.
Pissartanngorniunneq juulip ulluisa 13-anniit 18-ata tungaanut pisussaagaluarpoq, tamannali ukiormanna piviusunngornavianngilaq.
Aningaasassaaleqineq
Timersortartut peqatigiiffiisa KNR-ip oqaloqatigisaasa aningaasassaaleqinertik unammeqataarusuttullu ikippallaarnerat pissartanngorniunnissamut nalunaannginnerminnut tunngavilersuutigaat.
Qasigiannguani peqatigiiffik Kugsak 45 peqataanissamut nalunaanngitsunut ilaavoq:
- Akisunermik. Ilaa angallanneq akisunermik, Maasi Lange Gabrielsen Qasigiannguani utoqqasaat Kugsak 45-mi isikkamik arsaattartuarneersoq oqarpoq.
Disko 76-imit tunngavilersuutigineqartoq Qasigiannguanit tunngavilersuutaasumit allaanerungaanngilaq.
-Tassa piumasoqarnikuunnginnami. Tassa akissaq, Jens Mølgaard Disko 76-imeersoq oqarpoq.
Qeqertarsuarmiit Narsamut utimullu angalaneq Artic Umiaq Linep nittartagaani paasissutissat naapertorlugit inummut ataatsimut 7.550 koruuneqarpoq.
Akissaq kisiat timersoqatigiiffinni peqataasinnaannginnermut aporfiunngilaq, arsaateqatigiimmi ilaatigut ikippallaarnerat, Paamiuni utoqqasaat silami arsaattarnermik Nagtoralimmi sungiusaasup Kim Jakobsen Jensenip oqaatigaa.
