Nunatsinni tusagassiuutit suuppat?
Tamakku pillugit oqaluuserinnittoqarsinnaaqaaq, oqaluuserinnittoqaqaarlu. Kultureqarnermut Naalakkersuisoq kalaallit tusagassiutaat suuneranik nassuiaammik innersuussuteqarpoq. Anda Uldumip Demokraatineersut paragraf 37-imik apeqqutaanut akissummi allappoq, kalaallit tusagassiutaat nutaarsiassanik paasissutissanillu allanik siammarterisartut, Kalaallit Nunaanniittunut sullitallit. Tamannalu tassa paasilluarparput.
Anda Uldumilli aamma apeqqutigisimavaa Namminersorlutik Oqartussat namminneq nittartagartik kisiat atorlugu sulisussarsiortarnerat nalunaaruteqartarnerallu naammannersoq, akiliilluniluunniit tusagassiutini allani saqqummiunneqartassanersut.
Sulisussarsiornermi qanorluunniit iliortoqarsinnaasoq paasinarsivoq. Tassami ussassaarineq sorleq piukkunnarnerunersoq nalilersorneqartassammat. Nalilersuinermilu innuttaasut tusagassiutinik atuinerat ilaatinneqartassaaq, Mimi Karlsen oqarpoq.
Ilanngullugu oqaatigaa, Aningaasaqarnermut Sulisoqarnermullu Aqutsisoqarfiup Namminersorlutik Oqartussani atorfinititsinermut oqartusaasut Namminersorlutik Oqartussat nittartagaanni atorfinnik allagarsiussisarneq pillugu minnerpaatut piumasaqaateqarfigigai. Taannami nunatsinni innuttaasut amerlanersaasa alakkarsinnaammassuk, Namminersorlutik Oqartussanilu sulilerusuttut tassuuna suliffissarsiortarmata.
Mimi Karlsenilli akissutaani erserpoq Naalakkersuisut ulluinnarni ussassaarutinik nassiussineq ajortut sumilu naqinneqarnissaanik aalajangiisuuneq ajortut.
