Nunatsinni suliffissaaleqisut amerlisut

Nunatsinni suliffissaaleqisut suli amerliartorput, septembarip naanerani 2.628-ullutik - imaluunniit qaammammut siulianut naleqqiullugu 226-nik amerlisimallutik. Kalaallit Nunaanni naatsorsueqqissaartarfimmit kisitsisit kingulliit tamanna takutippaat.
Allattoq Hagen Højer Christensen, Carla Davidsen
novembarip 01-at 2012 06:37

Nuummi suliffissaaleqisut ukiup ataatsip ingerlanerani amerleriarnerpaasimapput. Tamaani suliffissaaleqisut septembarip naanerani 811-upput, siorna septembarip naaneranut naleqqiullugu 269-inik amerleriarsimallutik.

Suliffissaaleqisut Tasiilami aamma amerleriarsimapput. Suliffissaaleqisut septembarip naanerani 230-upput, siorna taamaalineranut naleqqiullugu 112-inik amerleriarsimallutik.

Kujataani illoqarfinni killormoorpoq, amerlanerit suliffissaqalersimallutik. Nanortalimmi suliffissaaleqisut ikileriarsimapput, siorna 140-eriarlutik, ukioq-manna septembarip naanerani 57-iinnanngorsimallutik.

Avannaani illoqarfinni anginerni marlunni, Ilulissani Aasiannilu, suliffissaaleqisut aamma ikileriarsimapput.
Uummannami suliffissaaleqisut septembarip naanerani 107-iupput, siorna taamalineranut naleqqiullugu 43-nik amerleriarsimallutik.

Nunatsinni illoqarfiit sinnerini suliffissaaleqisut annikitsuinnarmik nikerarput, ilaatigulli amerleriarsinnaasarlutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq