Nunatsinni suliffeqarfeeqqat piginnaanngorsarneqalerput

Isumasioqatigiinnerup inerneranik siunnersuisarfik, Rambøll nalunaarusiorpoq, taallugu GAP-analyse-mik, tassa suliniutinut angisuunut aatsitassarsiornermullu atatillugu, Nunatsinni suliffeqarfeeqqat pilersuisinnaanissaannik qanoq piginnaaneqarnersut nalunaarusiorlugit.

Nalunaarusiornermi pingaaruteqarnerit siunertat ilagaat, Nunatsinni suliffeqarfiit siuarsassallugit, aatsitassarsiornermi aamma imeq atorlugu nukissiornermi peqataanerunissaat, ingammik eqqarsaatigineqarluni suliniutinut angisuunut pilersuisinnaanissaq.

Tamassuma malitsigisaanik Nunatsinni suliffeqarfinnik ukiup massuma ingerlanerani arlaleriarluni pikorissartitsisoqassaaq, taamaaliortoqassalluni suliffeqarfiit pilersuisinnaanissaannut siunnerfeqartumik siuarsassallugit sunillu pilersuisinnaanissaannik qanorlu iliuseqarsinnaanissaannik siunnersorneqassallutik, taamaaliornikkut aatsitassarsiorneq allartilerpat piginnaaneqarnerunissaat anguniarlugu.

Pikkorissartitsinerit siulliit marluk upernaaru ingerlanneqartussat siunnerfeqassapput, suleqatissarsiornermi iliusissanik pitsaasunik ujartuinissaq. Taakku pikkorissartitsinerit suliffeqarfinnik piginnittunut pisortanullu tulluarsagaapput.

Pikkorissartitsinerillu allat ukiup massuma imgerlanerani pisussat tassaapput, suleqatissarsiornermi imaluunniit ingerlatseqatigiiffimmik aallartitsiniartoqartillugu suut unammillernartuunersut paasisitsiniutigineqassalluni.

Suliffeqarfiit aamma pikkorissartinneqassapput, suliniutinut angisuunut aamma aatsitassarsiornermut atatillugu, suliffeqarfiit qanoq paasinnissinnaanerisa allisarneqarsinnaaneri, taamaaliornikkut sanaartugassanut allanullu neqeroorutissanik tutsuiginartunik tunniussisinnaanissaq anguniarneqassalluni.

Pikkorissarnerit ilagissavaattaaq, nunat allamiut suliffeqarfiinik suleqatissarsiornermi isumaqatiigiinniarnernut paasinnilluarsinnaanissaq. Pikkorissarnermi tassani pisortat nuimanerit suliffeqarfinnilu inuit pinngitsuugassaanngitsut pikkorissartinneqassallutik.

Pikkorissartitsinissat pilersaarusiorneqarnerannut tunngaviunerpaavoq, Nunatsinni suliffeqarfiit piginnaasaqarnerulernissaat aamma namminneerlutik pilersuinissanut assigiinngitsunut isumaqatigiissusiorsinnaanerulernissaat anguniarniaqarluni.