Misissuineq: Nunatsinni sioqqat avammut tuniniarneqarsinnaasut

Nunarsuattali ilaani sioqqanik amigaateqartoqarmat tamanna uissuummissutigineqarpoq.

Nunarsuatsinni sioqqanik amigaateqartoqarpoq. Tamannalu nunatsinnut iluaqutaalluarsinnaavoq.
Tamanna "Nature Sustainability"-mi ilisimatuut Mette Bendixenip aamma Lars Lønsmannillu atuagassiaanni atuarneqarsinnaavoq. Ujarassiooq nunatsinneersoq Minik Rosing, atuagassiami suleqataavortaaq, taanna nassuiaavoq:

- Sioqqat nunatsinneersut nunarsuatsinni atorluarneqarsinnaapput, ilaatigut sanaartornermut, immallu qaffakkiartornerannut akiuiniarnermut allarpassuarnullu iluaqutaasinnaallutik, taamaaliornerlu nunatsinnut ineriartuutaallunilu iluaqutitaqassaaq.

Sioraq amigaateqarpoq

Sermit iigartartut aakkiartornerisa kingunerisaanik sioqqat sinerissamut annguttut annertusiartorput. Nunatsinni ima sioraqartigaaq nunarsuatsinni sioqqat immamut pisut 8 procentii nunatsinneersuusut.
Taakkulu sioqqat nunanarsuarmi amigaatigineqartunut atorluarneqarsinnaapput. Assersuutigalugu betoniliornermut sapusiornermullu.

AAMMA ATUARUK Qaqqat seqummaannik misissuinermi angusat ilisimatuut tupaallaatigigaat

- Sioqqat ajorsaatigineqarput. Nunatsinnili massakkut sioraqaraluttuinnarneratigut tonsit millionerpassut kuugussaaginnartut ukiumut amerliartuinnassapput, sioqqallu kuup akuiniittut iluaqutigineqarsinnaassapput, assaasoqartariaqassananilu. Nunatsinnimi sioqqat avammut tunineqarsinnaasut ima annertutigipput ullumikkut nunatsinni naalagaaffimmi tunisat ataatsimut nalingisa affarigai.

Taamaaliorniaraannili avatangiisinut sunniutissai pillugit assartuussinerillu pillugit naatsorsuusiortoqaqqaartariaqartoq, Minik Rosing oqarpoq.

AAMMA ATUARUK Nunarput nunarsuarmi nerisassaqartitsinermik qulakkeerisinnaasoq

- Ujarassiuup oqarnera naapertorlugu tamanna uppernarsaatissaqarpoq. Nunatsinniilli tuniniarneqarusussinnaanersut apeqqutaaginnarpoq. Københavns Universitetimi ujarassiooq Minik Rosing DR P1-imut aamma oqarpoq.