Nunatsinni pinerluttunik isumaginnittoqarfik pisortartaartoq
Julie Præst Wilche pinerluttunik isumaginnittoqarfimmi pisortanngorpoq.
Taannalu septembarip ulluisa aallaqqaataanni sulilissalluni.
Nunatsinni pinerluttunik isumaginnittoqarfik tusagassiuutinut taama nalunaaruteqarpoq.
Assi: Julie Præst Wilche.
49-nik ukiulik, Julie Præst Wilche isumaginninnermut inatsiseqarnermullu naalakkersuisoqarfimmi 2015-imili pisortaalerpoq.
- Nunatsinni pinerluttunik isumaginnittoqarfimmi sulilernissara qilanaarisorujussuuara. Atorfimmi tassani misilittakkakka naalakkersuisoqarfimmilu pisortatut sulilinni inunnut inuiaqatigiinnilu unammillernartunut atatillugu inatsiseqarnikkut ilisimasakka atorluarsinnaassallugit, Julie Præst Wilche oqarpoq.
AAMMA ATUARUK Pinerluttunik isumaginnittoqarfimmi siunnersortit isumaqatigiissuteqalerput
Julie Præst Wilche peqqissaasutut ilinniarsimasuuvoq kingornalu Cand. Scient. Adm-tut ilinniarsimalluni.
Taassuma pinerluttunik isumaginnittoqarfiup pisortarisimasaa, Naaja Nathanielsen taarsissavaa. Taannami Inuit Ataqatigiit qinnerlugit Inatsisartunut qinerneqarpoq kingornalu Naalakkersuisunngorluni. Naaja Nathanielsen pinerluttunik isumaginnittoqarfimmit apriilip naanerani soraarpoq.
Naaja Nathanielsen ilaatigut Inatsiseqarnermut naalakkersuisuuvoq, Julie Præst Wilchelu naalakkersuisoqarfimmi tassani pisortaalluni.
