Nunatsinni nipisanniartartut Islandimiunit qaangerneqarsinnaapput
Nipisat suaat MSC-mik meqqilersorneqartalernissaannik nunatsinni nipisanniartartut Islandimiunit qaangerneqarsinnaapput. Nipisat suanniarneq naatsorsuutiginngisamik ajorluinnartumik eqqugaasinnaavoq islandimiunit qaangerneqarsinnaagami.
Nunatsinni kinguppaat kisiisa MSC-mik meqqilerneqartartut Islandimi aalisakkat assigiinngitsut sisamat MSC-mik meqqilersorneqarput,
tassalu saarulliit, suluppaakkat kiisalu saarulliit ilaqutaat kullerit aamma sejit.
MSC-mik meqqilersuineq aalisakkanik tunisassiortunut pinngitsoorani iluaqutissartaqarpoq. Tunitsivigineqarsinnaasut amerlapput nunammi amerlasuut MSC-mik meqqilersukkanik tunitsivigineqarsinnaanissaminnut piumasaateqarput.
Nipisat suaat Islandimiunit MSC-mik meqqilersorneqannginnerannut pissutaavoq Islandimi aalisarnermut pisortaqarfimmit malittarisassanik najoqqutassiortoqarsimanngimmat.
Nipisat suaat pillugit piumasaqaatinik nipisanniarnerluunniit ungasinnerusoq eqqarsaatigalugu Islandimi Naalakkersuisut suliniutinik aallartitsisimanngillat Islandimi inuussutissarsiornermut naalakkersuisoqarfimmi tusagassiinermik suleqataasoq Þórir Hrafnasson oqarpoq.
Nipisanniarnermi malittarisassanik pisassiisarnerillu ukiumi nutaami atuutilersussat pillugit nunatsinni Naalakkersuisut aasalersoq nalunaaruteqarput. Tassani MSC-mik meqqilersuisalernissaq anguniarneqarluni.
Nunatsinni malittarisassat nutaat atuutilersinnerisigut Islandimiut qaangerneqarsinnaapput Islandimimi allannguuteqartoqarnissamik suli nalunaaruteqartoqanngimmat.
Islandimi nipisat suaannik MSC-mik meqqilersuisarneq suli atuutilersinneqanngilaq, naak tamatuma piareersarneqarnera siorna 2013-imi februaarimi aallartinneqaraluartoq, Þórir Hrafnasson Islandimi inuussutissaqarnermut ministeriaqarfimmi tusagassiinermik suleqataasoq taama oqarpoq.
