Nunatsinni najugaqartut amerlisimasut
Kalaallit Nunaanni ukioq manna innuttaasut amerlassusaat siorna piffissap taamaalineranut naleqqiullugu amerlanerupput.
Kalaallit Nunaanni Naatsorsueqqissaartarfiup kisitsisaataasa tamanna takutippaa.
Kalaalllit Nunaanni inuit ukioq manna juulip aallaqqaataani katillutik 56.367-iupput, siorna piffissap taamaalineranut naleqqiullugu 142-nik amerlanerullutik.
Taamaattoq innuttaasut Kalaallit Nunaanni inunngorsimasut ikiliartungaatsiartut aamma takuneqarsinnaavoq. Ukiummi marluk kingulliit ingerlaneranni 900-nik ikinnerulersimapput.
AAMMA ATUARUK Nunatsinni innuttaasut amerleriartut
- Akerlianik innuttaasut Kalaallit Nunaata avataani inunngorsimasut amerlanerulersimapput. 2019-imilu qaammatini siullerni marluinnarni 200-nik amerlanerulersimallutik. Tamatuma kingorna Kalaallit Nunaannut aamma Kalaalllit Nunaannit nuuttartut amerlaqatigiinnangajapput, Kalaallit Nunaanni Naatsorsueqqissaartarfik taama allaaserisaqarpoq.
Kommuneqarfik Sermersuumi, Kommune Kujallermi Avannaatalu Kommuniani najugallit siorna piffissap taamaalineranut sanilliullugu ukioq manna amerlanerupput, Qeqqata Kommuniani Kommune Qeqertalimmilu ikinnerulersimallutik.
