Meeqqat isigiarsunnerat malugineqanngitsoortarpoq
Isinut nakorsanngorniap Nick Duelundip nuna tamakkingajallugu meeqqanik atualeqqaanik 500-nit amerlanerusunik 2017-imi 2018-imilu misissuinermini paasivaa, misissukkami 5 procentii isaruartaartariaqartut. Nick Duelund:
- Isit nakorsanngorniaagama pingaartikkakku meeqqat isigisai atualertinnatik misissorneqartariaqartut, una pinerullugu atualereerpata ilinniarnissaminnut ineriartornissaminnullu periarfissaqarluarniassammata. Tassa imaakkami, meeqqat isigiarsukkaangamik, amerlanertigut ersinneq ajorami isigiarsuttuusut, aamma meeqqap nammineerluni nalusaramiuk isigiarsuttuulluni.
Nick Duelundip oqaatigaa meeraq nakoqattaartarlunilu niaqorlunnerartarpat, tamanna isigiarnermigut ajoquteqarneranut ersiutaasinnaasoq.
Paasissutissat
Meeqqat atualeqqaat tappissusiat
Nuna tamakkingajallugu atualeqqaat 70 procentii 500-init amerlanerusut isaat 2017-imi 2018-imilu misissorneqarput.
Meeqqat 5 procentiisa isigiarsuttuunerat paasineqarpoq. Taakkunannga 3 procentit isaruaqareerput.
Tamanna ukioqatigiiaat 8 procentiisa isaruartaartariaqarnerannik isumaqarpoq, tassa ukioqatigiiaani ataatsini 60-it isaruartaartariaqarput.
Tusarfik: Nick Duelund
Meeqqat isaasa misissortinnissaat puigorneqartartoq
Nick Duelundip oqaatigaa meeqqat suli atualinngitsut isigiarsuttuunerisa paasiaarneqanngitsoortarnerat ilaatigut ima peqquteqarsinnaasoq:
- Nunatsinni periarfissaqarpoq meeraq sisamaliigaangami peqqissutsimut misissorneqarnissaa. Ineriartornera sumut killippa? Isigisai tassani misissorneqarsinnaagamik, tusaasaalu soorlu. Kisianni takusinnaagatsigu atualereernikut isigiarsuttut taama amerlatigippata, taava una peqqutigerpasikkamiuk - angajoqqaajusut puigortaraat taanna periarfissaasoq.
Nunatsinni isit misisortinnissaannut periarfissaqarluarpoq
Illoqarfiit tamarmik isit nakorsaannit minnerpaamik ukiumut ataasiarlutik tikinneqartarnissaat aalajangiunneqarpoq.
Illoqarfinni peqqissaaviit tamarmik atortorissaaruteqarput tappissutsimik uuttuisinnaasunik. Nunaqarfinnimi? Nick Duelund tassunga akivoq:
-Taakkua soorunami nunaqarfinni piginngilagut, kisianni nunaqarfinni najugaqaraanni isigiarsuttuullunilu - meeraappat inersimasuuppalluunniit periarfissaqarpoq napparsimmaveeqqamut saaffiginnikkaanni, taava innersuunneqarluni taamatut misissorneqarnissamut.
Nick Duelundip oqaatigaattaaq tappissutsimut uuttuutitut atugassanik allagartanik allannertalinnik pisiortorsimallutik, taakkualu qanoq atornissaat pillugit ilitsersuutitaat videoliat ilanngullugit nunaqarfinnut 60-it sinnerlugit innnuttalinnut nassiunneqareersut.
Taamaammat meeqqat isimikkut misissortittalernissaannik paasisitsiniaasoqalersoq Nick Duelund oqarpoq:
- Paasissutissat assigiinngitsut plakatinngorlugit meeqqerivinnut atuarfinnullu nassiussorneqarnikuupput. Inersimasut meeqqat akornanniittut ilinniartitsisut, meeqqerisut angajoqqaallu takuniassagamikku - aa ukua ersiutit arlaat meeqqamma pigippassuk, taava imaassinnaavoq isigisaat misissortiltaalartariaqartut.
Meeqqap isigiaruttuusinnaanera pillugu
maluginiagassat qulingiluat:
1. Meeraq niaqorlunnerartarpoq
2. Isai nakoqattaartarput, akuttugaluamilluunniit
3. Peqatiminut sanilliulluni pikkorlioqqajaanerusarpoq, aalaatsimigulluunniit ajornartorsiuteqarluni
4. Uninngarpiarsinnaanngilaq, ukkataqarsinnaarpianngilaq
5. Isigiarsuttarpoq, pingaartumik ungasissumut, allattarfissuamiittut isigiarsuttarpai
6. Inngiasoqqajaasarpoq
7. Atuagassani qanilliserujussuaqqaarlugit atuarniartarpai
8. Isai qasorpasittarput, isinilu tagiartukulavai
9. Ukkataqaraangami isimi illua matunngikkaangamiuk sequnngertittarpaa
Tusarfik: Synoptik-Fonden.
Meeqqerivimmiittartut aamma misissorpai
Nick Duelundip meeqqanik atualeqqaanik misissuinermi saniatigut Uummammanmi, Ilulissani, Sisimiuni, Nuummi, Qaqortumi Tasiilamilu meeqqat meeqqerivinniittartut sisamanik ukiullit isaat aamma misissorpai.
- Ukua meeqqerivinni massakkut misissukkagut 250-pajaat misissoreerpagut, sulilu immaqa 70-it missaat misissortussaallugit. Tassani aamma ersarissilereerami arlaqartut meeqqat isigiarsuttut.