Nunatsinni marathonerluni Maniitsumi pissartanngorniuttoqaqqammerpoq
Frederik Brummerstedtip seeqqui suliaritinnikuugaluarput, naallu inuusuppallaarunnaareeraluarluni, silalu atoruminarpallaanngikkaluartoq akunnerit pingasut, minutsit marluk sekundillu aqqanillit atoreerlugit angutini siulliulluni apuuppoq.
- Piareersimaqqissaartutut misigisimavunga. Ullumikkut aallartilerama ajugaaniarnissara siunniuteqqallugu uppereqqeqqissaarlugulu. Taava iluatsippoq, tassami iluatsittorujussuartut nalilerpara pitsaanngikkaluartoq. Sila nillernermik, anorlerlunilu siallerami arpaffigalugu sakkortoorujussuugami, Frederik Brummerstedt Nuummeersoq oqarpoq.
Taanna ukiuni kingullerni normu 2-nngunngikkaangami normu 3-tut inissittarsimavoq, ukioq mannalu tassa pissartanngorluni. Inuttaalu tamanna soorunami nuannaarutigeqaa:
- Nuannersorujussuartut misigivara. Kiisami. Taamatut misigisimavunga, kiisami iluatsippoq. Taanna angunngitsuulaartagara. Aasianni siorna 4 sekundiinnarnik inornikuugakku massakkut iluatsimmat soorunami nuannaarutigisorujussuuara, Frederik Brummerstedt oqarpoq.
Aappaagu pissartanngorniunnissamut peqataassanerluni peqataassannginnerluniluunniit suli aalajanginngilaa, tassami seeqqumigut aamma suliaritinnikuunini eqqarsaatigisariaqaramiuk:
- Takussavarput, aamma inuusukkunnaarama, qaammatip tulliani 48-liilerama, taamaammat taanna uatsilaaq nalilersorumaarpara. 48-liiliivikkama seeqqukkalu illuttut suliaritinnikuullutik, Nuummiu 47-nik ukiulik Frederik Brummerstedt, angutini Nunatsinni marathonimi ukioq manna pissartanngortoq oqarpoq.
Anguteeraq Petersen normu 2-tut inissippoq, taassuma atorsimavai akunnerit sisamat, minutsit tallimat, sekundillu 48-t.
Siverth Thorsen normu 3-nngorpoq, taassumallu 42,195 kilometerit arpakkamigit atorpai akunnerit sisamat, minutsit 37-t, sekundillu 25-t.
Arnani marathonertuni marluk apuupput.
Sørine Petersen arnani pissartanngorpoq, taassumallu atorpai akunnerit sisamat, minutsit 25-t, sekundillu 36-t.
Salome Hansen normu 2-nngorpoq atorlugit akunnerit sisamat, minutsit 42-t, sekundillu 38-t.