Nunatsinni inuit timersuutaanik pissartanngorniutitsinerit
Ullumi arfininngornermi inuit timersuutaanik pissartanngorniutitsinerit Ilulissani aallartissapput. Kalaallit Nunaanni Timersoqatigiit Kattuffiannit kattuffittut nutaatut 'Arctic Sports Greenland' oktobarip 13-iani 2012-imi akuerineqarluni ilaasortanngorpoq. Kattuffimmik pilersitsisut inuit timersuutaanik unammersuartitsisarnikuupput, ukioq mannali Kalaallit Nunaanni Timersoqatigiit Kattuffiata ataatsimeersuartitsinerani pisortatigoortumik kattuffittut akuerineqareernerisa kingunerisaanik pisortatigoortumik siullerpaamik nunatsinni pissartanngorniutsitsisinnaalerput.
Ilulissani pissartanngorniutsitsinermi timersortartut 64-it ilaassapput, unammisitsinerit novembarip pingajuaniit novembarip 9-ata tungaanut ingerlanneqassapput. Nunatsinni inuit timersuutaanik pissartanngorniutsitsinerit saniatigut aamma aliikkusersuinerit ingerlanneqassapput.
- Ukioq manna nutaartatut eqqaasinnaavarput ulo atorlugu mattattuulluni mattammik nungoqqaanniunneq, Arctic Sports Greenland-imi siulittaasup tullia Kim Rosing knr.gl-imut oqarpoq.
Inuit timersuutaasa saniatigut aamma eqqillit timersuutaat aallaavigalugit nunatsinni pissartanngorniutsitsinerit Ilulissani ingerlanneqassapput. Aaqqissuisut pissartanngorniutsinissamut isumassarsiorfigisimavaat Dene Games aamma Arctic Winter Games.
-Ukua inuit pinnguaataat tammatsaaliorlugit nunatsinni ingerlateqqinnissaat pingaartikkatsigit, taamaammat massakkut ataavartumik ingerlanneqarnissaat kattuffittut akuerineqaratta qulakkeerparput, taama siulittaasup tullersortaa Kim Rosing oqarpoq.
Arctic Sports Greenland kattuffittut inissisimalernerata kingunerisaanik ukioq manna nunatsinni inuit timersuutaanik pissartanngorniunnerni ajugaasut tuukkanik ujaminnatsinneqartalernissaanik aamma kinguneqarpoq, ujamimmi taakkua pisortatigoortumik nunatsinni pissartanngorniuttoqarnerani tunniunneqartarput.
Ilulissani GM-ertitsineq pillugu paasisaqarnerorusukkuit imaluunniit ulluni sorlerni suut unammissutigineqassanersut paaserusukkukku taava ataatungaani linki toorlugu paasissutissat piumasatit takusinnaavatit.