Nunatsinni innuttaasut ikiligaluttuinnarput
Nunatsinni innuttaasut ukioq manna januaarip aallaqqaataani 55.847-pput. Taamaalilluni nunatsinni innuttaasut 2015-ip ingerlanerani 137-nik ikileriarsimapput.
Allattoq Jaaku Lyberth
februaarip 08-at 2016 17:20
Ukiut 20-t ingerlaneranni innuttaasut aatsaat taama ikitsigipput, naatsorsueqqissaartarfiup innuttaasut amerlassusiannik naatsorsukkat nutaat ullaaq manna saqqummiussaani atuarneqarsinnaavoq.
Nunatsinni kommunini sisamaasuni Kommuneqarfik Sermersuumi innuttaasut kisimik amerliartorput.
Nuummi innuttaasut amerliartornerpaapput.
Nuummi innuttaasut 2015-imi 324-nik amerleriarput, tassalu nunatsinni innuttaasut 31 procentii Nuummi najugaqarput.
Nunaqarfinni innuttaasut suli ikiliartorput.
2015-imi nunaqarfinni innuttaasut 35-innarnik ikilisimapput 7.470-iniit 7.435-nut ikilisimagamik, Naatsorsueqqissaartarfik taama allappoq.