Nunatsinni inatsisinik atuutsitsinermut tunngatillugu IA iliuuseqaqqusisoq
Nunatsinni pinerluttunik isumaginnittoqarfiup, eqqartuussiveqarnerup politiillu iluanni pissutsit pillugit Folketingimi marsip qaammataani tusarniaasoqareersoq taama siunnersuuteqarput.
Nunatsinni suliassaqarfinni arlalinni pissutsit, inuiaqatigiinnut inatsisinik tunngaveqartunut nutaaliaasunut naapertuutinnginnerat tusarniaanermi immikkut sammineqarpoq.
Folketingimut ilaasortap Inuit Ataqatigiinneersup Aaja Chemnitz Larsenip pitsanngorsaatissatut siunnersuutit tigussaasut 30-t tusarniaanermi tassani saqqummiuppai. Taakkulu Socialdemokraatinit Dansk Folkepartiimillu ilassilluarneqarput.
Nunatsinnilu inatsisinik atuutsitsinerup pitsanngorsarneqarnissaanut Folketinginimi partiinit allanit naammattumik tapersiisoqassanersoq paasinarsissaaq.
AAMMA ATUARUK Eqqartuussiveqarneq IA-p pitsanngorsaavigerusukkaa
Nunatsinni inatsisinik atuutitsinerup Danmarkimut naapertuuttunngorsarneqarnissaanut danskit naalakkersuisuisa pisariaqartumik suliniuteqarnissaat naammattunillu aningaasaliissuteqarnissaat Inuit Ataqatigiit aalajangiiffigisassatut siunnersuummi piumasaraat.
- Inatsisinik atuutsitsineq patajaallisarniarutsigu inuiaqatigiillu inatsisinik tunngaveqartut nutaaliaasut kissaatigalugit, ullumikkut iliuuseqarnissarput pisariaqarpoq, Aaja Chemnitz Larsen tusagassiorfinnut nalunaarummi taama allappoq.
Aalajangiiffigisassatut siunnersuutip imarisaata annersaa danskit naalakkersuisuisa naalakkersuisooqatigiinnissamut toqqammavissaanni anguniagassatut siunniussimasaannut assingivoq. Tassanimi allassimavoq "danskit naalagaaffiata Savalimmiuni Kalaallit Nunaannilu akisussaaffeqarfiini pissutsit Danmarkimi pissutsinut assigiissarneqarnissaat sulissutigineqassasoq" - ilassutitulli ima allassimasoqarluni: “Savalimmiuni Kalaallit Nunaannilu pissutsit atuuttut tunngavigalugit immikkoorutaasut aallaavigalugit.”
Danskilli inatsisinik atuutitsinermut ministeriata Søren Papep suliassaqarfimmi annertuumik pitsanngorsaasoqarnissaa maannakkorpiaq aningaasassaqartinneqanngitsoq oqaatigaa 'oqaloqatigiissutigineqarnissaali ammaffiginerarlugu'.
Aalajangiiffigisassatut siunnersuut pilersaarutit mallillugit aasaanerani sulinngiffeqarnissaq sioqqullugu oqaluuserineqartussaavoq.
