Immap assingi pillugit nutaamik isumaqatigiissusiornissaq ministerip kissaatigaa
Kalaallit Nunaata imartaanut immap assingisa nutarterneqarnissaat pillugu Kalaallit Nunaat Danmarkilu nutaamik isumaqatigiissusiortariaqarput.
Danmarkimi Geodatastyrelsip Nunatta kujataani kitaanilu immap assinginik 73-inik isumaqatigiissutigineqartutut kingusinnerpaamik 2018-imi tunniussinissaq pisinnaanngitsoq paasinarsereersoq, danskit silap pissusianut, pilersuinermut nukissiuuteqarnermullu ministeriat Lars Christian Lilleholt (V) taama siunnersuuteqarpoq.
Venstrep naalakkersuisuutitaata taamanilu Nunatsinni naalakkersuisuusut 2009-mi atsioqatigiissutigaat, imaanilu uuttuinissaq pineqarani immalli assinginik naqitanik nutaanik taakkulu digitalinngortinneqarnerinik tunniussinissamik imaqarluni.
Aamma atuaruk Ministeri: Kalaallit Nunaannut immap assingi nutaat qaqugu piariissanersut nalunarallarpoq
Lilleholtilu naapertorlugu isumaqatigiissut suli "pingaaruteqarlunilu annertuujuvoq".
- Ajoraluartumik kinguaattoorutigineqartussanngornera siulliullunga ajuusaarutigissavara. Maannali siumut isiginissaq Namminersorlutillu Oqartussat danskillu naalakkersuisuisa atorsinnaasaannik aaqqiissutissarsinissaq pingaarpoq. Taamaammat siunnersuutigissavara Geodatastyrelsip aamma Namminersorlutik Oqartussat suleqatigiinnissamik isumaqatigiissutiminnik nutarterinissaannut piffissamik tunineqassasut, ministeri Folketingimi ippassaq marlunngornermi unnukkut oqallittoqarnerani taama oqarpoq.
Venstre: Soraartoqarnissaa siulittuutigineqarsinnaasimanngilaq
Naalagaaffiup suliffeqarfiutaata 4000-it missaanniittut Københavnimit illoqarfinnut allanut nuunneqarnissaannik danskit naalakkersuisuisa ukiarmi aalajangernerat pissutigalugu kinguaattoorneq pivoq. Suliffeqarfiit taakku ilagaat Geodatastyrelsi, immap nunallu assinginik tamanik suliaqartuusoq, Aalborgimullu novembarip aallaqqaataani nuunneqartussaq.
Aamma atuaruk Kinguaattoortoqarnissaa ilimagineqarpoq
Nuunneqarnissaatali kingunerisaanik Nunatsinni immap assinginik suliaqartunit 15-iusunit 14-it atorfimminnit soraarsimapput. Soraartoqarnissaali siulittuutigineqarsinnaasimanngitsoq, Folketingip Nukissiuuteqarnermut, Pilersuinermut Silallu pissusianut ataatsimiititaliaani siulittaasoq Thomas Danielsen (V) KNR-imut taama oqarpoq.
- Immap assinginik suliniummut sunniuteqarnissaa takorloorsimanngilluinnarparput. Suleqatigiit immikkut ittunik ilisimasallit ataatsimoorlutik soraarnerat immikkut illuinnartuuvoq.
Immalli assinginik suliaqarnerup aallarteqqinnissaanut Venstre Dansk Folkepartiilu periarfissanik allanik misissuinissaq ammaffigaat. Ilaatigut aamma suliffeqarfiit namminersortut Geodatastyrelsimik ikiuisinnaanissaat.
Aamma atuaruk Nuussinissaq Nunatsinnut neriorsuummik aarlerinaateqarpoq
Silap pissusia pillugu ministeri naapertorlugu, Nunatta kujataani kitaanilu immap assinginit 73-iusussanit 32-t maannamut naammassillugit suliarineqareersimapput.
IA kissaateqarpoq
Namminersorlutik Oqartussanut nutaamik isumaqatigiissusiornissamik ministerip siunnersuutaa Folketingimi partiinit taperlernit taperserneqarpoq sisamanngorpallu akuersissutigineqartussatut naatsorsuutigineqarluni.
Inuit Ataqatigiit, Siumup partiillu saamerliit siunnersuutaat taamaalillugu itigiartinneqassaaq, tassalu immap assinginik suliaqarnissamik isumaqatigiissutip piffissaq eqqorlugu tunniussinissamik danskit naalakkersuisuisa peqquneqarnissaannik siunnersuut.
Aaja Chemnitz Larsenip IA-meersup marlunngormat oqallittoqarnerani erseqqissaatigaa avataanit ikiorneqarnissaq siunertaralugu Geodatastyrelsi Nunarput isiginiarumaaraa neriuutigalugu.
- Paasissutissanik suliaqarnermi tamakkuninnga suliaqartumut kalaallimut ajornannginnerussaaq, taassumami Nunatsinnut aallartitamut naleqqiullugu paasissutissani iluliaqarnera paasilluarsinnaaneruaa.
