Nunatsinni ilinniaqqinneq soqutigineqaleraluttuinnartoq

Nunatsinni ilinniagaqarneq pillugu Naatsorsueqqissaartarfiup kisitsisaataani marlunngormat saqqummiunneqartuni takuneqarsinnaavoq.

Nunatsinni ilinniarfinni ingerlaqqiffiusuni ilinniartitsisunngorniarneq suli soqutigineqarnerpaavoq.

Aamma Nuummi ilinniartitsisunngorniarfiusumi aamma ilinniaqqinnernik neqerooruteqartartumi, Ilinniarfissuup pisortaata Dorthe Korneliussenip ilinniaqqinnissamut soqutiginninnerup annerulersimanera maluginiarpaa.

- Meeqqat atuarfiannut inatsisip iluarsartuunneqaqqinneranut ukiuni qulini atuutereersimalersumut tamanna attuumassuteqarpoq. Inatsisinik iluarsartuusseqqinnermut atatillugu ilinniartitsisunut ilinniaqqiffiusinnaasorpassuit aallartinneqarput. Taamaalilluta ilinniaqqinnissamut tunngasunik neqerooruterpassuaqarpugut, Dorthe Korneliussen oqarpoq.

- Ilinniartitsisut ilinniaqqinnerminni ilikkakkatik taamaallillugit ingerlaannartumik atorsinnaasarpaat - tamannalu iluaqutaavoq, Dorthe Korneliussen oqarpoq.

Taanna aperineqarami tamanna inuiaqatigiinnut qanoq iluaqutaanersoq ima akivoq:

- Tassami meeqqat atuarfii nutarterinernut tamanut malinnaatinneqarput, Dorthe Korneliussen naggasiivoq.

Meeqqat atuarfianni inatsisitigut iluarsartuusseqqinneq kingulleq 2003-mi aggustip aallaqqaataanni atuutilerpoq.