Nunatsinni eqqartuussinissaq Aarhusimut nuutinneqarpoq, soorliuna?

Narsami aallaasersorneq ukioq kingulleq pisoq eqqartuusivimi sapaatit akunnerata tulliani suliarineqalerpat, ini eqqartuussiviusartoq Eqqartuussiveqarfik Kujallermiinnami Aarhus Byretimiissaaq.

Inunnik aqqanilinnik qulimiguulimmi issimasunik katillugulu ininnik 14-inik toqutseriarsimasutut pasineqarluni angut unnerluunneqassaaq. Pisut toqutseriarnermut tunngasut 14-it saniatigut, aallaasersornerup ullualunnik pinngitsiarnerani pisuni assigiinngitsuni, tigusaareernermilu kingorna pisuni assigiinngitsuni aamma unnerluunneqassaaq. 

Aallaasersornerup kinguninngua angut 21-nik ukiulik politiinit tigusarineqarpoq taamanili tigummigallarneqalerluni. 

Nuummi Pineqaatissinneqarsimasunut Inissiisarfimmi tigummigallagaanermmini inatsisinik unioqqutitseqqippoq taamaammallu tarnimikkut nappaatillit katsorsarneqartarfianni  Danmarkimi Risskovimiilluni.

Nakuusernerup ikuallatitsinerullu kingorna Danmarkiliaanneqartoq

Unnerluussut naapertorlugu angut ineeqqami 124-mi tummeqqanik savminermik sakkulerluni igalaamik aseruisimasutut aamma unnerluunneqarpoq. Pisoq ukioq kingulleq oktobarip arfineq-pingasuanni unnukkut pisimavoq. 

Pineqaatissinneqarsimasunut Inissiisarfimmi novembarip qulingiluaani inummik tununngasumik uppisitsisimavoq kingornalu qingaagut tillussimallugu.

Inissiisarfimmi ineeqqamini januaarip arfineq-pingajuanni equutissiamik qipimminillu ikuallatitsisimavoq "pujoorterujussuarlugu pequttallu ajoquserlugit" .

Taakkulu ilaatigut pissutigalugit sapaatit akunnerata tulliani eqqartuussinissaq Eqqartuussiveqarfik Kujallermi pisussaagaluartoq Danmarkimut nuutinneqarpoq. 

- Unnerluunneqartup Risskovimi R3-mi tigummigallarneqarnera ilaatigut pissutigalugu Aarhus Byretimi inimik eqqartuussiviusartumik atorpugut, suliami unnerluussisoq Martin Strandby Nielsen oqarpoq. 

Suliaq suli suliarineqalinngimmat suliamut tunngasut annerusumik taassuma oqaaseqarfigerusunngilai. 

Ilisimannittut qulit

Suliami annertuumi unnerluussutit assigiinngitsut 28-t allanneqarsimapput. Amerlanerillu angutip 21-nik ukiullip ukioq kingulleq Narsami marsip 22-ani ualikkut minutsini 45-t missaanni qoorortuumik aallaasersorluni toqutseriarsimasutut pasineqarneranut tunngassuteqarput.   

Suliaq annertummat ullut tallimat eqqartuussinermi atorneqassapput, takunnissimasullu qulit aggersarneqarsimasut videokkut nassuiaassapput. 

Qulimiguullip tungaanut aallaammik eqqarnermi saniatigut inunnut illup qaavaniittunut illullu iluanut eqqarsimavoq. 

"Aallaammik aallilaariarl takuss"

Aallaasersorneq ullualunnik sioqqullugu angut Narsami umiarsualivimmi aalisariummut ikivoq qoorortuumillu aallartiinnariamik kaliber 17-imik tillilluni. Qoorortooq taamaattoq ullut marluk qaangiummata aallaasersornermini atorpaa. 

Unnerluussut naapertorlugu qoorortuumik tillinnera ataasinngornermi marsip 20-ani pivoq. Ullorlu taanna aamma illoqarfimmi arnamik sioorasaarivoq ima oqarluni: "Aallaammik aallilaariarl takuss".

Eqqartuussinerup sumiiffissaa allanngortoq

Eqqartuussineq danskit eqqartuussivianni ingerlanneqartussaagaluartoq, pisussat allat tamarmik Eqqartuussisoqarfik Kujallermi pisussaagaluit assigissavaat. 

Suliap suliarineqarnissaanut eqqartuussisoq, eqqartuussisooqataasut, illersuisoq, unnerluussisoq oqalutsilu Danmarkiliartinneqassasut, unnerluussisoq oqaluttuarpoq. 

Taamaalillunilu suliap suliarineqarnerani sumiiffik kisimi Kalaallit Nunaanniit Danmarkimut nuunneqassaaq. 

Unnerluussisussaatitaasullu piumasaqaataat naapertorlugu eqqartuussisoqassappat, unnerluussaq Danmarkimi R3-miiginnassaaq. 21-nik ukiullip piffissami killiligaanngitsumi tarnimikkut nappaatillit Danmarkimi napparsimavianiittussanngortinniarlugu eqqartuunneqarnissaa, unnerluussisup Martin Strandby Nielsenip piumasariniarpaa. 

Tassa tarnimikkut nappaatilinnut eqqarsartaatsimikkullu kinguarsimasunut eqqartuusinerni Kalaallit Nunaanni aallaavigineqartartoq paragraf 157 naapertorlugu eqqartuussut. 

Nunatsinni inissaqartinneqanngitsut

Unnerluussisup piumasaa naapertorlugu eqqartuussisoqassappat, angut Danmarkimiittussanngorlugu pineqaatissinneqassaaq. Nunatsinni tarnimikkut nappaatillit eqqarsartaatsimikkullu kinguarsimasut pinerluuteqarsimasut inissaqartinneqannginnerat tamatumunnga peqqutaavoq. 

Nunatsinnimi taakkununnga inissiivissaqaangilagut.