Nunatsinni Akilermilu Inuit atisaannik misissuisoqalersoq
Peter Andreas Toftip Nunatsinni Akilinermilu naggueqatigiit Inuit piffissami ukioq 1700-mit 1930-mut atisaata europamiunit sunnigaasimanerannik misissorniarpaa.
Taanna Ph.d.-liornermini atisanik nunatsinneersunik misissuitilluni taamatut misissuiniarluni isumassarsisimavoq.
- Kalaallit Nunaanni atisat malugeqqusaarutit inuttullu inissisimanermut qanoq atorneqartarsimanersut aammalu nunasiani atisaliortarnerup europami atisanik ilusilersueriaatsimit qanoq sunnigaatigisimanersoq misissorusulerpara, Peter Andreas Toft oqarpoq.
Suliniummi atisat oqaluttuarisaanermut pingaarutillit ilaatigut Upernavimmeersut, Qeqertarsuarmeersut, Nuummeersut, Kujataaneersut Akilinermeersullu misissorneqassapput. Peter Andreas Toftip aningaasat tapiissutaasut ilaat atorlugit naggueqatigiit Inuit atisaannik nunani allani katersat alakkarniarpai aammalu Danmarkimi Katersugaasivissuarmi ataatsimeersuartitsinermik 2015-imi aaqqissuussiniarluni.
Sapere Audep ilisimatuunut piukkunnaatilinnut aningaasaliissutaanit ilisimatuunut inuusuttunut 39-inut ullumi agguaasoqarpoq, aningaasallu nunani allaniinnermut imaluunniit ilisimatuut ataatsimeersuarnerinut atorneqassapput. Aningaasaliissutaasut 500.000 koruuniupput.
Peter Andreas Toftip saniatigut aamma uumassusilinnik ilisimatooq Shane Terry Gero kigutilissuup qarluusartarnerisa misissuiffiginissaanut tapiiffigineqarpoq
