Nunatsinni aatsitassarsiornerup oqaluttuarisaanera nalunaarusiarineqartoq
Nalunaarusiaq suliarineqarpoq atuakkiortumit eskimologimillu, Mads Fægteborgimit. Nalunaarusiap saqqummersinneqarnera, Villuip aningaasaateqarfianit aningaasalersorneqarluni.
Nunatsinni aatsitassarsiornissamut tunngatillugu, politikerit pitsaanerusumik aalajangiisalernissaannik nalunaarusiaq innersuussisuusoq, ICC-mit aamma WWF-imit oqaatigineqarpoq.
Nalunaarusiap siunertaraa, qangali aatsitassarsiornermi ajornartorsiutaasinnaasut ullutsinni aqqusaarneqannginnissaat, taamaalilluni aalajangiinerni, kalaallinut ataasiakkaanut Nunatsinnullu tamarmut, siunissami iluaqutaanerunissaat aqqutissiullugulusooq.
ICC aamma WWF isumaqarputtaaq, nuna iluamik ingerlanneqartoq aamma aningaasarissaarnikkut ingerlanneqartussaasoq, soorlu inuit atugarisaat, peqqissusaat, avatangiisinut tunngasut, kulturimut tunngasut allarpassuillu tamakkiisumik ilaatinneqartarnissaat aalajangiinermi pingaartinneqartariaqartut.
Fægteborgip nalunaarusiaata sammisaasa ilagilluinnarpaat, qangali aatsitassarsiornermi misilittakkat ajornartorsiutillu naapittakkat, Nunatsinni suliffissuaqarnermut allanullu tamassumunnga attuumassuteqartut, taamaalillutillu inuiaqatigiit atugaannut aamma attuisartut, nalunaarusiami ersersinneqarluni.
Kalaallit Nunaata siuariartorneranut, imminullu akilersinnaasumik silatusaarnermillu politikerit akisussaassuseqarlutik aalajangiisarnissaat, nalunaarusiami allaaserineqarportaaq.
Nalunaarusiaq maanna saqqummersinneqartoq, tallimaasussat aappassaraat. Siorna saqqummersinneqarpoq 'Inuiaqatigiit piginnaatitaanerannik' qulequtserneqartoq. Tassani allaaserineqarluni ukiuni qulini kingullerni aatsitassarsiornerit inuiaqatigiillu peqataatinneqarneri, tamakkulu qanoq pitsaanerusumik inerneqarsinnaaneri eqqartorneqarlutik.
