Nunatsinni aatsitassanik piiaanissaq ajornanngitsuinnaanavianngilaq
London Mining-ip Isukasiani piianissamut qinnuteqaataa akuerineqassaguni suliffeqarfissuaq aningaasaliisussanik pissarsiorniaqqaartariaqassaaq, aatsitassarsiofissap sananeqarnera milliard koruuninik marlunnik kisitsisitalinnik akeqassaaq. Tamannalu iluatsissappat akissarsiorsinnaanissaq aamma periarfissaasariaqarpoq.
-Kalaallit Nunaanni aatsitassarsiornermik piaanissamut pilersitsiniarneq marloqiusatut isigineqarsinnaavoq. Ajunngitsortatut taaneqarsinnaavoq nunami maani ingerlalluartumik demokratiimik aqutsisoqarnera, politikkikkullu aalakkaasumik ataqatigiissaarluartumik ingerlatsisoqarluni. Taakku marlut taaneqartut tuniniaaffimmut nutaarluinnarmut isertissagutta tunngaviusumik pisariaqarput. Kalaallit Nunaannili aatsitassamik piiaanissaq ajornanngitsuinnaanngilaq. Nuna savimminermik tuniniaaffissanut ungasippoq, nunap ataqatigiinnermut attaveqarfii amigarput, nuna qeriuaannartumiippoq, Kalaallit Nunaatalu imartaata annertuumik iluliaqarnera savimmininermik assartuiniarneq ajornarnerulersippaa, taama London Mining-ip pisortaa Dr. Xiaogang Hu KNR-imut oqarpoq.
Avatangiisit eqqarsaatigissagaanni Isukasiani aatsitassanik piianissamik pilersitsisoqarnissaa aamma ajornanngitsuinnaanavianngilaq. Tamatumunngali sanilliukkaanni nunap ataqatigiinnermut attaveqarfiisa amigarnerisa aammalu nunap inissisimaffiata ajornartorsiutaaneruvoq. Suliaq avatangiisinut ajoqqutaanavianngitsoq pisortaq isumaqarpoq.
-Iluarsartuullugu pilersaarusiatta avatangiisinut sunniuteqassaguni annikitsuararsuarmik sunniuteqassaaq. Suliffeqarfiup namminersortup iluarsartuullugu pilersaarusiarput misissuiffiginikuuaat, siunissami ajornartorsiutinngorsinnaasunik nassaarsimannginnamik immikkut taasaqanngillat. Tamanna oqaatigereerlugu uagutsinnut aamma pingaaruteqartorujussuuvoq aatsitassanik piiaafissatta sananeqarnerani inuit nunamilu kulturerineqartup annertuumik qajassuunneqarnissaat. Taamaaliunngikkuttami suliamut pingaaruteqartoq tassalu inuiaqatigiinniit tapersersorneqarnissaq anguneqarnavianngimmat, taama Xiaogang Hu isumaqarpoq.
