Katuaq Nunatsinni aallartisaasut sammineqartut
- Nunarsuarmut ataqatigiiffiusumi Kalaallit Nunaanni inuiaqatigiit angisoorsuungikkaluartut inunnik piginnaasalinnik nutaaliorsinnaasunillu ulikkaarpoq, taakkulu tamarmik nammineq tunisassianik kiffartuussissutinillu suliaqarnermut tunngatillugu annertuumik piukkunnaateqartuupput, SIUA INUvation taama ilaatigut oqarpoq.
Aallartisaasunut suliniut SIUA INUvation, Namminersorlutik Oqartussani Inuussutissarsiornermut Niuernermullu Naalakkersuisoqarfimmik kiffartuussinissamik isumaqatigiissusiorluni "Iværksætter Showcase"-imut tikilluaqqusivoq, aallartisaasut nunamit tamarmeersut nunanit allanit pisiortortartunut, nunami namminermi suliffeqarfinnut tunisassaminnik nioqqutimminnilluunniit tassani nittarsaassisinnaassallutik. Pernille Fischer Boulter, SIUA INUvationimeersoq, tusagassiutinut nalunaarummi taama ilaatigut allaaserisaqarpoq.
Naalakkersuisup Aqqaluk Jeremiassenip Iværksætter Showcase ullumi ullaap tungaani nalunaaqutaq qulingiluanut ammassavaa, aallartisaasullu Canadamit USA-miillu pisiortortartunit ullumi aqagulu kingorna ataatsimeeqaqattaartarsinnaassallutik.
Ullut marluk tulliuttut ingerlaneranni ataatsimeeqaqattaarnerit katillugit 120-nit amerlanerusut pilersaarutigineqartut, SIUA INUvationip oqaatigaa.
Kikkut tamarmik aallartisaasartut ilassiartornissaannut Katuami ullumi marlunngornermi pingasungornermilu ualikkut nalunaaqutaq sisamanit arfernup tungaanut periarfissaqassapput.