Sulorarnermi VM-eqataanissaq Nunatsinneersut marloriarlutik ajugaaratarsinnaasut
Sulorartartut arfiniliusut Islandimi pissartanngorniuttoqarneranit peqataaqqammerput, taamaattumillu iligiikkuutaarluni nunarsuarmi pissartanngorniunnernut Kinami maajip 19-ianit 26-ianut pisussanut piareersimalluartut nunanut allanut unammisartut sungiusaasuata Svenningsenip oqaatigaa.
Arnat unammiartussat aqqi
Milka Brønlund, Nina Høegh Møller aamma Sara Lindskov Jacobsen.
Angutit unammiartussat aqqi
Frederik Elsner, Jens-Frederik Nielsen aamma Toke Ketwa-Driefer.
Unammineq Sudirman Cuppimik taaguuteqarpoq. Taanna ukioq ataaseq allortarlugu 1989-imiilli ingerlanneqartarpoq. Nunarsuarmi pissartanngorniunnermi nunanut allanut unammisartut angutit arnallu peqataatinneqassapput.
Nunatsinneersut unammiarnissaannut sungiusaasuat Rune Svenningsen isumalluarpoq. Tassami siorna EM-ertoqarmat peqataasussat unammisaminnut sakkortuunut ilaatigut ajugaammata.
- Neriulluarpunga, Kasakhstanimeersut Kenyameersullu piginnaasaat qiviassagukkit, ilimagaara unammilerutsigit ingerlalluarutta ajugaaffigisinnaallugit, Rune Svenningsen KNR-imut oqarpoq.
Nunatsinnit unammiartussat arfiniliusut sinerissatsinni assigiingitsuneersuupput, taamaammat ataatsimoortillugit sungiusarneqanngillat. Taamaattorli sungiusaasuminit qanoq naatsorsuuteqarfigineqarnertik nalunngilluaraat sungiusaasuat oqarpoq.
- Qaammat ataaseq qaangiuppat Nuummi nunatsinneersunik pissartanngorniunneq ingerlanneqarpat peqataasussat takutitsilluarnissaat naatsorsuutigaara, taassumalu kingorna qaammataannanngorsimassaaq nunarsuarmi pissartanngorniunnermut peqataajartornissaat, Rune Svenningsen KNR-imut oqarpoq.
Taassuma oqarnera naapertorlugu unammiartussat sungiusarluarnertik suli attaatiinnassavaat.