Nunat tamalaat aquttuisa, G7 nunani piitsuni akiuussusersuinissamut aningaasaliisussatut kaammattoraat
Namminermi tamanna aamma soqutigisarigamikku.
Præsidentit, ministeriunerit, nunanut allanut tunngasunut ministerit inuillu nuimasut allat, katillugit 200-nit ikinnerunngitsut, taama isumaqarput. Nutaarsiassaqartitsivik Reuters taama allaaserisaqarpoq.
AAMMA ATUARUK WHO-p nunani tamani innuttaasut quleraarterutaat septembarimi akiuussuserneqarsimatinniarai
Nunani tamalaani aqutsisut akiuussusersuisoqarnissaanut isummaminnik nunanut pisuunut G7-imeersunut kaammattuuteqarput. Nunarsuarmimi nunat aningaasarsiorfiunerpaat arfineq-marluk sapaatit-akunnerata massuma ingerlanerani naapeqatigiittussapput.
Nunani tamalaani naammattumik akiuussusersuisoqanngippat, virusit allannguuteqarsinnaanerat aarlerinarnerulissasoq, siaruaannerulissasullu allaaserineqarpoq.
Tamanna pillugu ataatsimoorussamik suleqatigiittoqartariaqartoq, isumaqarput.
AAMMA ATUARUK Unicef: Nunat pisuut akornanni akiuussutissanik pisiortorpallaarnaveersaartoqassaaq
Nunat G7-imiittut Tuluit Nunaanni tallimanngorpat naapissapput, tuluit ministeriunerata Boris Johnsonip, Frankrigip, Tysklandip, USA-p, Italiap, EU-p, Japanip Canadallu naalakkersuinikkut siuttui tallimanngorpat ataatsimeeqatigissavai.
Naalagaaffiit Peqatigiit qullersarisimasaata, Ban Ki-moonip allagaq aamma atsioqatigiiffigaa.
Afrikami nunat Saharamit kujammut innuttai 2 procentit ataallugit taamaallaat coronavirusimut akiuussuserneqarsimasut, aviisip The Guardianip allaaseraa.
Nunat pisuut nunani tamalaani akiuussusersuinermi suleqatigiissutigisamut, Covaximut aningaasaliinissaat, Naalagaaffiit Peqatigiit peqqissuunissaq pillugu suleqatigiiffiata, WHO-p, maajimi kaammattuutigaa. Nunat pisuut meeqqanik nunaminni akiuussusersuinatik, akiuussutissat nunanut piitsunut tunissutigissagaat kaammattuutigineqarluni.