WHO-p nunani tamani innuttaasut quleraarterutaat septembarimi akiuussuserneqarsimatinniarai
Nunarsuarmi nunani tamani inuit ikinnerpaamik qulerarterutaat coronamut septembarimi akiuussuserneqariissapput.
Naalagaaffiit Peqatigiit peqqissuunissaq pillugu suleqatigiiffiata, WHO-p qullersaa Tedros Adhanom Ghebreyesus taama oqarpoq.
Taanna nunat ilaasortat Schweizimi Genèvemi ippassaq ataasinngornermi ataatsimeeqatigereerlugit taama oqarpoq.
Akiuussusersuinissamut nunat arlallit anguniakkamut malinnaasinnaasut erserpoq, nunalli piitsut angummanniarnissaminnut ilungersunartorsiorput.
Assersuutigalugu Afrikami nunat amerlasuut akiuussusersuinertik suli aallartissimanngilaat.
Oxford Universitymit ilisimatuut suliaat Our World In Data naapertorlugu afrikami inuit 27,6 millionit, tassa innuttaasut 1,58 procentii missaanniittut akiuussutissamik kapitereerput.
AAMMA ATUARUK Unicef: Nunat pisuut akornanni akiuussutissanik pisiortorpallaarnaveersaartoqassaaq
Asiami innuttaasut 5 procentii sinnilaarlugit coronamut akiuussuserneqareersut, Our World In Datami nalunaarsuinerup takutippaa.
EU-mi innuttaasut 35 procentingajaat akiuussuserneqareerput.
WHO-p qullersaata nunarsuarmi tamarmi suliniuteqartoqarnissaa kaammattuutigaa, tamannalu akiuussutissanik nunarsuarmut siammaanissamik qulakkeerutaassaaq, taamaalilluni nunat pisuut kisimik akiuussuserneqassanatik.
Nunarsuarmi innuttaasut 30 procentiisa ukiup naalernerani akiuussusersorneqareersimanissaat naatsorsuutigineqarpoq.
Taamaammallu WHO-p nunanut ingerlalluartunut akiuussutissat sinneruttut nunanut piitsunut tunniussinissaannik kaammattuutigaa, taakku inuusunnerusunut akiuussusersuinermut atorneqarniassammata.
/ritzau/Reuters
