Nunat tamalaanit patermik tunniussisoqarsinnaaneranut Nunatsinnit ammaassisoqarpoq

Kræfterluni napparsimasup Nini Tessingip 22-inik ukioqartup anaanaata nunaqqatini qinnuigai patermik tunissuteqarnissamut nunat tamat nalunaarsuiffiannut allatseqqullugit. Nini Tessingip katsorsartinnini aporfiginagu ilinniarnertuunngorniarfimmi soraarummeernini nunatsinni aasaq tusaamaneqaatigilerpaa. Kingorna nappaataa uteqqippoq, maannalu inummit allamit patilersinnissaq kisiat neriuutigileqqavaa.

-Ullut ingerlapput, tunissuteqarusuttumillu suli tusanngilagut. Nassaarpata ingerlaannaq paasitinneqartussaavugut. Ullulli tassa ingerlapput. Tujorminaqaaq. Neriuinnartariaqarpugut eqqarsaatillu oqimaatsut atornaveersaarlutigit, Sara Tessing, Nini Tessingimut anaanaasoq oqarpoq.

Nini Tessingilli timaata ipiutaasartaata pissuseqataanik nassaarnissamut neriuut angivallaanngilaq. Nunaqqataasa akornanni assinganik nassaarnissamut periarfissaq angineruvoq, taakkulu allattorsimaffimmi amerlavallaanngillat.

Kalaallit tunissuteqarusuttut maanna Nini Tessingitut inuunerminnik ulorianartorsiortitsisunik ikiuinillutik tunissuteqarsinnaalernerat Peqqinnissaqarfimmit nuannaarutigineqarpoq.

-Inuit saaffiginnillutik pineqartumik inunnillu allanik ikiuerusunnerat pitsaalluinnartuusoraarput. Napparsimasumik ataasiinnarmik ikiuiniarluni allatsittoqarsinnaanngilaq. Allattorsimaffimmut allatsikkaanni taava nunarsuarmi tamarmi napparsimasunit kikkunnilluunniit atorneqarsinnaasunngortinneqassaaq, Dronning Ingridip Napparsimmavissuani nakorsaaneq Folmer Lynggaard oqarpoq.

Paterminnik tunissuteqarusullutik allatsikkumasut Sara Tessingip qujamasuutigisupilussuuai.

-Piffissap ilaani - massakkut kingusinnerusukkulluunniit - inuunerup inuuneranik annaassisinnaallutik paasissavaat, taamaaliorusussuseqarnerallu assut nuannerpoq.

Nunarsuaq tamakkerlugu patermik tunissuteqarnissamut allattorsimaffimmi inuit 21 millionit timimik ipiutaasartaata pissusiinik allattugaateqartoqarpoq. Allattorsimaffimmi allatsissimasut 1 promillesa missaat tunissuteqarnissamut toqqarneqartarput. Nunatsinni ukiumut napparsimasoq ataaseq patilersinneqarnissaminik pisariaqartitsisarpoq, amerlanertigullu ilaqutaasoq tunissuteqartarluni.

Aaversittartuugaanni aatsaat patermik tunissuteqartunngortoqarsinnaavoq. Tamanna aaversittartut nappaateqarnerinik ingerlaavartumik misissortinneqartarnerinik peqquteqarpoq.

Aaversittartunngornissamik paterminilluunniit tunissuteqartartunngornissamik kissaateqaraanni Nuummi, Sisimiuni, Ilulissani, Qaqortumi Aasianniluunniit aavisarfinnut saaffiginnittoqarsinnaavoq. Illoqarfinnimi taakkunaniinnaq pisinnaavoq.

Tamatuma kingorna nunarsuaq tamakkerlugu allattorsimaffimmut Bone Marrow Donors Worldwidemut allatsittoqartarpoq, tassanngaanniillu nunarsuaq tamakkerlugu napparsimasunut patermik tunniussisoqartarluni. Kalaaleq tunissuteqartussatut toqqarneqarsimapat, taava Danmarkimi Rigshospitalimut patermik tunniussiartortitsisoqassaaq. Pateq kuutsiup nalaatigut milluarlugu pissarisiarineqartarpoq. Tamanna ilisimajunnaarseqqaneqarluni pisarpoq kingornalu ulluni marlunni napparsimmavimmi ulluni marlunni uninngassutigineqartarluni.

Paterminik tunisisartussatut allatsinnissaq suliaavoq annertooq, aaversittartunngoqqaartariaqarpormi, tamatumalu kingorna timip ipiutaasartaata pissusia aaversinnikkut paasiniarneqassaaq, tamannalu Danmarkimut nassiussilluni misissuinikkut pisarpoq. Suliaq qaammatinik marlunnik sivisussuseqarsinnaavoq.

Peqqissutsimut naalakkersuisoqarfik naapertorlugu allattorsimaffimmut allatsinnissamut siornatigut periarfissaqarsimavoq, aatsaalli manna suliarineqartarner aaqqissuussaasumik ingerlanneqartalerpoq aaviisarfinnilu sulisut periaaseq pillugu ilisimatinneqareersimapput.