Nunat issittumi NATO-mi suleqatigiit isumannaatsuunissaq pillugu qaninnerusumik suleqatigiinnissamik isumaqatigiittut
Allaaserisaq maajip 23-ani naqqinneqarpoq. Qulequttami allaqqagaluarpoq, "Issittumi nunat". Tamanna eqqunngitsumik paasineqarsinnaammat allanngortinneqarpoq “NATO-mi suleqatigiit.
Nunat issittumut sineriallit iligiit Issittumi isumannaatsuunissaq pillugu ataatsimoorlutik nalunaaruteqassallutik ullumi aalajangerput.
Naalagaaffiit issittumut sineriallit Kunngeqarfik Danmarkip nunarput Savalimmiullu ilanngullugit, Canadap, Islandip, Finlandip, Norgep, Sverigep aamma USA-p nunanut allanut tunngasunut ministeriisa Helsingborgimi ataatsimeereerneranni tamanna pivoq.
Isumannaatsuunissamut aporfiit, aningaasarsiornissamut periarfissat Issittullu isumannaannerulernissaanut iliuusissat oqallisigissallugit tassani ataatsimiipput.
- Issittoq nunarsuup ilaatut nunat tamalaat akornanni isumannaatsuunissami periuseqarnermi pingaaruteqaleraluttuinnarpoq. Ruslandip sakkutooqarnerulernerani Kinallu sakkutooqarnikkut periarsinnaanermut soqutiginninneruleriartornerani Issittoq patajaallisarparput.
- Sakkutuulersimaarnerulissaagut, alapernaarsuisinnaanerulerluta taavalu Issittumi avannaarsuarnilu ataatsimoorluni sungiusartoqarnerulissaaq. Ataqatigiissaarilluta oqimaaqatigiissitsillutalu taamaaliussaagut, ataatsimoorluni nalunaarummi allassimavoq.
KNR-imit nalunaarutip immikkoortui qallunaatut kalaallisullu nutserneqarput. Taamaattumik pisortatigoortumik nutserinerunngilaq, nalunaarusiaq tuluttut allaqqammat. (Løkkep assitaata qulaaniippoq).
Nunat aamma isumannaallisaanermik aporfiit oqaloqatigiinnerussallutik isumaqatigiipput.
- Canada Europalu tamaani anusinngorsaanissamut illersornissamullu akisussaanerujartortillugit, periarfissat nutaat takkussuutsillugit, nutaanillu aporfeqalersillugu, issittup isumannaatsuunissaanut nunallu akornanni aningasarsiornikkut ineriartorneq pillugit qanimut suleqatigiinneq aatsaat taama pingaartigaaq, ataatsimut nalunaarummi ilaatigut allassimavoq.
Najuunnissaq pingaartoq
Ilisimatusarnerup isumannaatsuunissaa, aningaasaliiffiusinnaasunik qinaasinissaq atortorissaartillugu pingaarutillit pillugit apeqqutinut tunngasut ataqatigiissaarnissaannik immikkut ilisimasallit suliakkinneqarput.
Sulilu una atuuppoq:
- Issittup isumannaatsuunissaa pisuujunissaa sakkuaaffiunnginnissaalu anguniarlugit suleqatigiiginnarnissarput qilanaararput.
Nunanut allanut tunngasunut naalakkersuisoq, Múte B. Egede (IA), Helsingborgimi ataatsimeeqataavoq.
-Issittoq sillimaniarnermi politikkikkut pingaaruteqartorujussuanngornikuuvoq, taamaammallu NATO-p nunarsuup immikkoortuani tamaani aallussinerata inissisimaneratalu nukittorsarnissaa pingaaruteqarpoq. Ineriartornerup nunarsuup immikkoortuani Issittumi pissutsinut immikkuullarissunut innuttaasunullu ataqqinnittumik pinissaata qulakkeernissaanut peqataaqataanissaq Kalaallit Nunaata kissaatigaa. Naalakkersuisut tusagassiorfinnut nalunaarutaanni taama issuarneqarpoq, imalu nangippoq.
- Qanoq ilaatigut nukittunerusumik ataqatigiissaakkamillu sakkutooqarnikkut najuunnissaq, annertunerusumik aningaasaqarnikkut ineriartornissaq attaveqaatinillu pingaarutilinnik illersuinissaq oqaloqatigiittarfinni eqqortuni suleqatigiissutiginissaa ataatsimoorluta oqaloqatigiissutigaarput. Taakkulu Issittumi sillimaniarnikkut politikkip ineriartorneranut tamarmik naapertuupput, Múte B. Egede oqarpoq.
Taanna Danmarkip nunanut allanut tunngasunut ministeria, Lars Løkke Rasmussen Savalimmiullu nunanut allanut naalakkersuisuat, Bárður á Steig Nielsen ataatsimeeqataapput.
USA-p Nunatsinnut immikkut aallartitaata Jeff Landryp USA-llu Danmarkimut aallartitaata Ken Howeryp Future Greenland ataatsimeersuarnermi pisoqarfioqisumi, Nuummi peqataaqqammerneranni tamanna pivoq.
USA-p Nuummi sinniisoqarfittaava sisamanngornermi ammarpaa. Pisoq taanna akerliussutsimik takutitsiffiuvoq.
Ken Howery KNR-imit apersorneqartilluni præsidentip pissaanermik atuinissaq atorunnaarsereeraa oqarpoq.
- Kalaallit Nunaata siunissaa kalaallit namminneq aalajangigassaraat, aallartitaq oqarpoq.
