USA-p præsidentiata Donald Trumpip Kalaallit Nunaat tallimanngornermi unnukkut sammeqqippaa. 

Truth Socialiminiit Kalaallit Nunaannit assitalerlugu inuulluaqqusilluni saqqummiuppaa, allaqqasoq "Hello, Greenland!" (Aluu Kalaallit Nunaat, aaq.) qulaani.

Donald Trumpip assimi angisuumik tunuliaqutalimmi Kalaallit Nunaanni nuna qatsissumiit isiginnaaraa takuneqarsinnaavoq. TV 2 naapertorlugu pineqartoq tassaavoq Tasiilaq.

Nuummi sapaatip akunnerani pisoqarfiungaatsiareersorlu taama saqqummiisoqarpoq, Trumpimmi immikkut aallartitaa Jeff Landry kiisalu Amerikamiut Danmarkimi kunngeqarfimmi aallartitaat Kenneth Howery illoqarfiit pingaarnersaannut tikeraareersullu.

Taakkua inuussutissarsiorneq pillugu ataatsimeersuarnermi Future Greenlandimi peqataapput.

Jeff Landry Nuummi Katuap silataani tusagassiortunit apersorneqarpoq. Assi © : Pauli Wille / KNR

Naalakkersuisut siulittaasuata, Jens-Frederik Nielsenip (D) aamma nunanut allanut naalakkersuisup Múte B. Egedep (IA) Jeff Landry ataasinngormat naapippaat.

Tamatuma kingorna Naalakkersuisut aallaqqaammulli oqariartuutaat Naalakkersuisut suli aalajangiusimagaat, Jens-Frederik Nielsenip tusagassiortunik katersortitsisoqarnerani oqaatigaa, 

- Kalaallit Nunaat inuiaqatigiillu kalaallit ataqqineqassasut oqaatigaarput, Jens-Frederik Nielsen oqarpoq.

Tamatuma saniatigut immikkut aallartitatut tikeraartut siornatigut politikeriusimasunik inuussutissarsiornermillu suliaqartunik naapeqateqarput.

Amerikamiut Nuummi sinniisoqarfittaavat 3000 kvadratmeteriusoq sisamanngormat ammaanersiorneqarpoq. Ammaanersiornermi aallartitaq peqataavoq, Jeff Landryli Nuummiit pingasunngormat unnukkut aallarluni.

Ammaanersiortoqarnerani , inuit 1000-it tungaannoortut sinniisoqarfiup silataani akerliussutsimik takutitsipput.

Aajuna asseq, Donald Trumpip, Truth Socialikkut saqqummiussaa siammarterneqartoq. ( Truth Socialimeersoq assileqqitaq). Assi © : KNR