Nunat inoqqaavi Københavnimi eqqarsaqatigiipput
Danmarkimi nunanut allanut tunngasunut ministeri Villy Søvndal Naalakkersuisuttalu siulittaasuat Kuupik Kleist nunat inoqqaavisa aallartitaat arlallit katersoriarlugit isumasioqatigivaat. Tassani nunani tamalaani pisussat aalajangersorneqassapput.
Nunat inoqqaavisa pisinnaatitaaffii FN aqqutigalugu pappialatigut naak anguneqareeraluartut, timitalerneqarnissai suli amigarput. Nunammi inoqqaavisa ilarpassuisa inuuffigisaanni, kultoorianni namminerisaminnillu aalajangiisinnaalernissaat suli amigaatigineqarpoq. James Anaya, FN-ip nunap inoqqaavi pillugit nalunaarusiorsimasoq oqarpoq. Tamannalu Naalakkersuisut siulittaasuata Kuupik Kleistip isumaqatigaa.
- Nunat inoqqaavi FNip ataani ukiut 20-it 30-it inissisimareerput. Taamaattoq malunnarpoq suli peqataanerput sunniussimanngitsoq. FN-imit puigorneqaqqajaannguatsiarpoq nunat inoqqaavisa peqataatinneqarnissaat, Kuupik Kleist oqarpoq.
Taamaammat James Anaya assigalugu Kuupik Kleist neriuppoq nunat tamalaat nunat inoqqaavi pillugit ataatsimeersualerpata nunat inoqqaavisa pisinnaatitaaffiinut iluaqutaasumik pisoqarumaartoq.
Nunat inoqqaavisa Københavnimi eqqarsaqatigiinnerat tallimanngorneq arfininngornerlu pissaaq. Kalaallit Nunaata aallartitaqarfia, Samet inatsisartuit nunallu inoqqaavisa suliniaqatigiiffiat IWGIA aaqqissuisuupput.
