Kulturi

Atuakkiortunut nersornaasiuttagaq kalaallimut?

Kalaallit Nunaata siullermeerluni atuakkiornikkut akissarsisinneqassanersoq Nunat Avannarliit Siunnersuisooqatigiivinit ullumi aalajangerneqassaaq. Niviaq Korneliussen piukkunneqartuni ilaavoq, aamma Naja Rosing-Asvid meeqqanut inussuttunullu akissarsititsisoqarnissaanut peqataavoq.

Allattoq Inge S. Rasmussen

oktobarip 27-at 2015 10:19

Nutserisoq Kerté Jeremiassen

Atuakkiornermik 350.000 kroner-nik akissarsiassartalik Reykjavik-mi ingerlanneqassaaq, ilaatigut Niviaq Korneliussen atuakkiortullu 14-it allat peqataaffigineqassalluni.

Niviaq Korneliussen-ip atuakkiaqqaataa tamanit nunattalu avataani nersualaarneqaqisoq "Homo Sapienne" akissarsisussatut innersuussanut ilaavoq.

Aamma atuaruk Niviaq Korneliussen nersornaaserneqartussatut innersuunneqartunut ilaasoq

Niviaq Korneliussen 1990-mi inuuvoq Nanortalimmilu peroriartorluni. Nuummi inuiaqatigiilerinermik ilisimatusarfimmi ukiorpaaluit ilinniareerluni maanna Århusip universitet-itani tarnip pissusiinik ilisimatusarpoq.

Niviap atuakkiortarnini oqaluttuaaraliornermi "Allatta"-mi 2012 aallarnerpaa, tassanilu oqaluttualiaaraq "San Francisco" ajungaassutigalugu, taannalu atuakkiami "Inuusuttut - nunatsinni nunarsuarmilu." saqqummersinneqarpoq.

Aamma atuaruk Niviaq Korneliussen Louisiana Literaturemi peqataasoq

Nunat Avannarliit Siunnersuisooqatigiivisa akissarsisitsinissaata saniatigut aamma meeqqanut inuusuttunullu
akissarsisitsisoqassaaq, tassani aamma Kalaallit Nunaat peqataatitaqarpoq, tassa Naja Rosing-Asvid atuakkiaa "Aqipi - aasivimmiittoq."

Akissarsititsinissamut uani toqqaannartumik nalunaaqutaq 16.30 malinnaasinnaavutit. Imaluunniit paasisaqarnerorusukkuit Facebook alakkaruk.