Kulturi

Niviaq Korneliussen Louisiana Literaturemi peqataasoq

Kalaallip atuakkiortup Niviaq Korneliussenip atuakkiaqqaava Homo Sapienne saqqummersinneqarmat atuakkiaq soqutigineqartorujussuuvoq, atuakkiaalu eqqumiitsulianik katersugaasivimmi Louisianami, Danmarkimiittumi, atuakkiat pillugit ullununi makkunani festivalertoqarnerani maanna ilaatinneqartussanngorpoq.

Allattoq Inge S. Rasmussen

aggustip 21-at 2015 05:04

Nutserisoq Mads Lynge

Korneliussenip atuakkiaa atuakkialerisunit taamaasilluni amerlanerusunit ilisimaneqalersinnaassaaq.

24-nik ukiulik Niviaq Korneliussen, BogForums debutantprisimik nersornaasigassatut siusinnerusukkut innersuunneqareerpoq, soorlu aamma Nunat Avannarliit Siunnersuisoqatigiivisa atuakkianut ukiumoortumik nersornaasiuttagaannut innersuunneqarnikuusoq.

AAMMA ATUARUK Niviaq Korneliussen Naalagaaffiup eqqumiitsuliornermut aningaasaateqarfianit akissarsitinneqartoq

Niviaq Korneliussenip atuakkiat pillugit Louisianami "Louisiana Literature"-imik taallugu festivalertoqarnissaanut atatillugu quppersakkami allaaserineqarnerani ilaatigut oqaatigineqarpoq Niviaq Korneliussen Danmarkimi atuakkialerinermi nutaajunerusumi malunnaateqarlualersinnaasutut ilimanaateqartoq.

Aamma atuaruk Atuakkiaq "Homo Sapienne" nunatsinni Danmarkimilu soqutigineqarluartoq

E-bogitut saqqummissaaq

Korneliussenip atuakkiaa Homo Sapienne kalaallisut qallunaatullu saqqummerseqqinneqassaaq, atuagaq qarasaasiatigut atuarneqarsinnaasunngorlugu saqqummerseqqinneqarami, tassa e-bogitut saqqummersinneqarami.

Homo Sapienne atuakkianik internetikkut niuffaffinni Danmarkimi annerni pisiarineqarsinnaassaaq, soorlu Saxo.com-imi pisiarineqarsinnaassalluni. Naqiterisitsisartoq Lene Thekildsen, Milik Publishingimeersoq taama ilisimatitsivoq.