Nunat Avannarliit Nuummi kulturisioqatigiinnerat aallartittoq
Nunat avannarliit Nuummi kulturisioqatigiinnerat Nuummi Nuuk Centerimi inuppassuarnit peqataaffigineqarluni ippassaq pisortatigoortumik aallartippoq.
Meeqqat inuusuttullu qitinnermik takutitsipput, qilaatersortoqarpoq, uaajeertoqarpoq, rapperlunilu erinarsortartoq Tarraq Nina Kreutzmann Jørgensen peqatigalugu erinarsorput, inuppassuillu hundredenik sinneqartut Nuuk Centerimi ualikkut tallimanut tusarnaariarput.
Kulturisioqatigiinnerup ulluani siullermi isiginnaartitsissusiamik takutitsisoqarpoq, isiginnaartitsissusiat assigiinngitsut tallimat Nuummi narsarsuarmi blok 2-mi aamma blok 6-mi takutinneqarput.
AAMMA ATUARUK Nuuk Nordisk Kulturfestivalip pilersaarutini saqqummiuppai
Isiginnaartitsisartup Makka Kleistip arnaq utoqqaap eqqarsaatai pillugit isiginnaartitsissusiaq kisimiilluni isiginnaartitsissutigissaavaa, aamma Sørine Steenholdtip atuakkiaanit Zombiet nunaannit isiginnaartitsissusiaq takutinneqarpoq.
Atuakkiortup Kim Leinip Nuummi narsarsuarmi blokkini najugaqarallami misigisimasaanit Karina Møller isiginnaartitsissaaq, aamma 1980-ikkuni blokkit ilaanni toqutsisoqarsimaneranit oqaluttuaq isiginnaartitsissusiami takutinneqassaaq.
Isiginnaartitsissusiat assigiinngitsut tallimat blok 2-mi aamma blok 6-mi fritidsklubbiusimasuni ullormut pingasoriarlutik takutinneqartassapput.
Nuummi Narsarsuarmi blokkini najugaliit akeqanngitsumik isiginnaartitsissuanik kalaallisut saqqumiunneqartunik aqagumut isiiginnaariarsinnaapput, tallimanngorpamiillu tuluttut saqqummiunneqassallutik.
Isiginnaartitsissutigineqartut tallimat uani takulaariffisinnaavatit:
