Nunarsuup silaannaata kissatsikkiartornera ajorluinnartunik kinguneqarsinnaasoq
Ilisimatuut immikkullu ilisimasallit arlaannaanulluunniit attuumanngitsut 40-t nunarsuarmit tamaneersut, tuluit nunanut allanut tunngasunut ministereqarfiata silap pissusiata allanngornerata kingunerisassai pillugit nalileeqqusimavai.
- Akissutigisaallu nuannerpallaanngilaq, maannakkorpiarmi politikkikkut iliuuseqartoqannginnera pissutigalugu nunarsuup silaannaata kiassusaa 2000-ikkut naalernerini gradinik 3,5-inik qaffassangatinneqarpoq, Sir David King, tuluit nunanut allanut tunngasunut ministereqarfiata silap pissusia pillugu oqaaseqartartua aviisimut Politikenimut taama oqarpoq.
Silap pissusiata allanngoriartornera inunnut ataasiakkaanut sunniuteqassaaq
- Aamma eqqaamassavarput silap pissusiata allanngoriartornera nunarsuarmi sumiiffimmi ataasiinnarmi pinnngimmat, sumiiffinnili arlalissuarni ataatsikkut pilluni, taamaattumillu pissutsit annertuumik qajannarsisimapput, King, Cambridge Universitymi ilisimatusarnermi pisortaasimasoq taama oqarpoq.
Ilaatigut Kinami karrinik katersuinermut nunarsuarmilu sumiiffinni allarpassuarni naatitanik allanik katersuinermut annertuumik aarlerinartorsiortitsisinnaanerata saniatigut, silaannaap kissatsikkiartornera inunnut tamanut aalerinartorsiortitsissaaq.
Aamma atuaruk Afrika milliardilikkaanik atorfissaqartitsivoq
- Silannaap kiannerulernera inuup timaata kiammik sunnigaasinnaaneranut killigititanik siunissami qaangiisaleratarsinnaavoq, aamma inunnut alanngortami qasuersaartunut, nalunaarusiami taama oqaatigineqarpoq. Pingaartumillu Indiap avannarpasinnerusua, Kinap kujataata-kangisissortaa USA-llu kujataata-kangisissortaa kiassuarmik toqqutigineqarsinnaasumik eqqugaasarsinnaasut ilimagineqarpoq.
Inuiassuit illuarneri annertuserujussuassapput
Tamatumunngalu peqatigitillugu nunarsuarmi sumiiffinni amerlanerusuni qarsutsinersuaqartarnissaa ilimagineqarpoq - soorlu assersuutigalugu Kinami Kuussuaq Sungaartoq, Pakistanimi kuussuaq Indus-delta kiisalu Indiami kuussuaq Ganges, nalunaarusiami taama naliliisoqarpoq.
Tamannalu inuiassuit illuarnerannik aatsaat taama annertutigisumik kinguneqarsinnaavoq, Afrikami taamatut maannakkut pisoqarnerata arlaleriaataanik.
Ajunaarnersuilli nalunaarusiami siulittuutigineqartut ilumut pinngitsoortinneqarsinnaappat?
- Aap, pinngitsoortinneqarsinnaapput. Nalunaarusiammi matuma siunertaraa suliniutit pitsaasut maanna ingerlanneqartut tamaasa kajumissaarutigissallugit. Politikkikkut iliuuseqarusussuseq alliartortoq takusinnaavarput, paavip silap pissusiata illersoraa tusaavarput aammalu nunat G7-mut peqataasut ikummatissat uummassusilinneersut tunngaviginagit aningaasaqarnermik pilersitsinissamik eqqartuisut aamma tusaavagut.
- Silap pissusia pillugu Parisimi ataatsimeersuarneq aallarniutaannaavoq. Iluatsissinnaasariaqarparput, Sir David King taama naggasiivoq.
