Afrika milliardilikkaanik atorfissaqartitsivoq

Massakkut arlaatigut iliuuseqartoqanngippat aningaasat atorfissaqartinneqartut amerlagaluttuinnassasut,nunat tamalaat aningaaserivissuannit oqaatigineqarpoq.

- Maannangaaq annertunerusumik iliuuseqartoqanngippat Afrika ulersuartarnissamut, panernersuaqartarnissamut, kiannerulernissamut aamma immat qaffasinnerulernissaannut naleqqussartariaqassaaq, taakkunngalu peqatigitillugu nappaatigineqartartut allanngornerat annertunerujussuanngussalluni, nunat tamalaat aningaaserivissuanni silap pissusaata allanngornera pillugu sinniisuutitaq Andrew Steer oqarpoq.

Afrikap ineriartornissaa pisariaqartinneqaraluaqisoq, silap pissusaata allanngoriartorneranit unitsinneqariaannaasoq Andrew Steerip oqaatigaa.

Nalaagaaffiit Peqatigiit silap pissusaa pillugu suliaqarnerminni Afrikami pissutsit pingaarnerutinnerusaqaraat taassuma ilanngullugu oqaatigaa.

Nunat killiit nunanut allanut aningaasaliissutigisartagaasa amerlanersaat, Kinamut Brasiliamullu tunniunneqartarput.