Nunarsuatsinni kuussuit navianartorsiorput
Nunarsuatsinni isumalluutitta ilaat navianartorsiortoq tassaavoq imeq. Imeq kisimi navianartorsiunngilaq, imerli kuussuartigut kuuttoq nunarsuatsinni aamma navianartorsiorpoq. Allaammi kuussuit annersai navianartorsiorput. Pinngortitaq pillugu nunarsuaq tamakkerlugu suliniaqatigiiffiup, WWF-ip, nalunaarusiai nutaat taama paasissutissiipput.
Nunarsuarmi kuussuit annersai sapusiorfigineqarner-mikkut, umiarsuarnillu angallaffiungaaramik, navianartorsiorfiusorujussuupput, suliffissuarnit nunaatilinnillu mingutsitsiffioqalutik, aalisapiluffiullutik, silaannaallu allanngornerata kingunerisaanik sialuisatseqalutik. Paasisat amiilaarnartut Pinngortitaq pillugu nunarsuaq tamakkerlugu suliniaqatigiiffiup nalunaarusiakkut saqqummiuppai. Nunarsuarmi imermut ullorititamut atatillugu sisamanngorpat marsip ulluisa 22-ani ullorsiortoqarnissaanut atatillugu kuussuit anginerpaat qulit misissuiffigineqarsimapput, ajornartorsiutit amerlaqaat ilungersunarlutillu; kuussuaq Igitsinimiittoq ”Nilen” kuussuarlu Pakistanimiittoq ”Indus” kuukkunnaariartorput, kuukkunnaariartuinnarnerannullu pissutaavoq, tamaani sialuisannerulernera. Kuussuaq ”Kina”-miittoq ”Yangtse” suliffissuit piliaannik kemikalianit pissuteqartumik, inuillu mingutsitsinerannit, mingutsitsiffioqaaq. Kuussuaq ”Mekong” aalisapiluffiusorujussuuvoq. Kuussuit Indiami ”Ganges” kiisalu Amerikami ”Rio Grande” narsaatinut atatillugu imermik tigooraaviunermit kuukilligaluttuinnarput. Europami kuussuaq”Donau” umiarsuarnit angallaffiunermit mingutsitsiffioqaaq.
Kiisalu Autraliami ”Murrey Darling”-ip kuussuani uumassuseqarsinnaasoq tamarmi aarlerinartorsiorpoq, aalisakkat eqaluusakkunnik taaneqartartut kuussuarmi amerlavallaalersimammata, eqaluusaq Europa-miit Australiamut ukiut 30-t matuma siorna pissunneqarsima-voq, eqaluusat suna tamaat marrarmik isortuinnarsuanngortippaat, uumassuseqarsinnaasorlu tamaat unittooqqasutut ilersillugu.
Maannakkullu piffissanngorpoq suliffeqarfissuarni pisortaasut, aammalu nunani naalakkersuisuusut paasisariaqalermassuk, silaannaap pissusaata allanngoriartornera kisimi nunarsuatsinni avatangiisitta allanngoriartorneranut pissutaanngitsoq.
Kuussuit aarlerinartorsiortorujussuupput, annaanniarlugit tuaviortumik qanoq iliuuseqarfigineqarnissaat pingaarutilerujussuullutik.
