Nunarsuarmi utoqqaanersaanerartoq Italiami toquvoq
Emma Morano novembarimi 1899-imi inunngorpoq, nunarsuarmilu 1800-kkunni inuusimasuni utoqqannersaattut kisiartaagunaraluarluni.
Emma Moranop sorsunnersuaq siulleq kingullerlu anigorpai, ilaatigullu biilit, radio, tv, oqarasuaat timmisartorlu saqqummersinneqaqqaarneri eqqaamasaqarfigalugit.
Emma Moranop ukioqqortusigaluttuinnarnini tusaamassutigilerpaa.
Ukioqqortugaluarluni inuummarittoq
Inuuialu malunnartinniarlugu nutaarsiassaqartitsivinnit assigiinngitsunit suaarutigineqartarpoq, illoqarfigisaanilu, Italiap avannarpasissortaani, Verbaniami ukiut tamaasa nalliuttorsiutigineqartarpoq.
117-inik ukioqalernera videokkut immiunneqarpoq, ukioqqortutigigaluarlunili ima silassorissimatigaaq allaat naneruutit kaagimiittut nammineq supusinnaasimallugit.
Manniit aapasut inuunerinnartorujussuusut, ukioqqortuup allanut ilitsersuutigaa.
Manniit aapasut inuunerinnartut
Arnap aviisimit The New York Timesimit apersorneqarnermini oqarpoq, inuusuttuaraallunili manniit aapasut marluk ullormut nerisarsimallugit.
Peqqissuuniaraannilu innajaartarnissaq, pujortartuunnginnissaq annikitsuinnarmillu viinnisortarnissaq aamma pingaaruteqartut, Moranop oqaatigaa.
Imigassamilli cognacimik aamma imigaqarsimavoq.
Ukiorpassuarni kisimiittuunini aamma patsisaasoraa, aapparisanimi, persuttaasarsimammat, 1938-imi anisissimavaa.
- Allamit tatisimaneqarusunngilanga, Emma Morano oqarpoq.