Nunarsuarmi sermit iigartartut sukkasoorujussuarmik tiffasinneruleriartortut
Nunarsuarmi tamarmi sermit iigartartut aatsaat taama sukkatigisumik aakkiartorput.
Sermit iigartartut annerpaartaat ukiuni kingullerni pingasuni piuneerupput.
Naalagaaffiit Peqatigiit kulturimut tunngasunik suliniaqatigiiffiannit, Unescomit nalunaarusiap tamanna takutikkaa, nutaarsiassaqartitsivik Reuters tallimanngornermi allappoq.
- Sermeq 9000 gigaton-iusoq 1975-imiilli aassimavoq, taannalu Tysklanditut angissuseqartutut 25 meterinillu issussuseqartutut assersuutigineqarsinnaavoq, World Glacier Monitoring Service-imi pisortaq, Michael Zemp Genévemi tusagassiortunik katersortitsinermi oqarpoq.
Sermeq aseqquasoq 450 gigatoniusut 2024-mi nunarsuarmi serminit iigartartunit aanngarpoq.
Aakkiartornera annerpaaq 2023-mi pisimavoq, tassa sermeq aseqquasoq 600 gigatonni aassimavoq.
Ukiuni hunnorujullikkaani matumani aniguisinnaanngitsut
Naalagaaffiit Peqatigiit ataanni nunarsuarmi silasiornermik suliniaqatigiiffiup (WMO) oqarnera naapertorlugu sermit iigartartut ukiunit arfinilinnit kingullernit tallimani aatsaat taama annertutigisut aassimapput. Taama AFP allappoq.
- Sermit iigartartut piuinnarniartinnissaa avatangiisinut, aningaasaqarnermut inuiaqatigiinnullu kisimi pingaaruteqanngilaq, taakkumi piujuaannarnissaanut tunngavoq, WMO-mi generalsekretæri, Caleste Saulo oqarpoq.
Suliniaqatigiiffiup Canadap kippasissuani, Canadami, USA-mi Skandinaviami, Europap qeqqani, Kaukasusimi, New Zealandimilu sermit iigartartut "2000-kkut anigornavianngikkaat" missiliorpaa.
Norgemi Sverigemilu serminik iigartartoqarpoq. Norgemi Jostedalsbræenimi sermeq iigartartoq 487 kvadratkilometerinik isorartussuseqartoq Europami anginerpaavoq. Sermeq iigartartoq nunap kippasissortaata ilaani Vestland fylkemiippoq.
Sermit iigartartut Issittumi aamma Kalaallit Nunaanni siorna aakkiartornerat annertuallaanngitsoq Skandinaviami Asiallu avannaani tamanna allaaneruvoq. Sumiiffinni taakkunani sermit iigartartunit sermeq aseqquasoq aatsaat taama aassimatigisut 2024-mi nalunaarsorneqarpoq.
- Amerlasoorpassuit isumaqatiginninniutigineqarsinnaapput, kisianni nunarsuup qanoq innera soorlu sikup aakkiartornerata killiffissaa isumaqatigiinniutigisinnaanngilarput, WMO-mi imeq imerlu nunarsuup qaaniittoq qeriuaannartoq pillugit pisortaq, Stefan Uflenbrook oqarpoq.
