Nunarsuarmi qimussimik sukkaniunnerit sakkortunersaat aallartippoq

Sukkaniunnissarsuaq aallarnerlugu Anchoragemi ippassaq persuarsiornartumik qimmit qimussertussallu takutinneqarput.

Qimussimik sukkaniuteqataasussat ukiormanna 65-iupput, taakkulu tamarmik immikkut aqqaneq marlunnik 16-inilluunniit qimmeqarlutik. Ilaatigut peqataallutik Alaskamiut Inuppiat, indianerit aamma arnat angutillu Alaskap saniatigut nunanit assigiinngitsuneersut.

Nalliuttorsiorpalaartumik Anchorage-imi ippassaq aallartinnersiortoqareersorlu, Anchoragemit 100 kilometerinik avannarpasinnerusumi illoqarfimmi Willow-imi sukkaniunneq ullumi aallartinneqarpoq.

Sukkaniunnerminni aqqutigisassaat 1.600 kilometerinik isorartussuseqarpoq, tassa Anchorage-mit illoqarfimmut Nome-mut ingerlaartussaagamik, orpippassuit, qeriuaannartup masarsui, qaqqat, aput anorersuillu aqqusaartussaavaat. Tassa aqqutissaat ilungersunartuuvoq navianartoqarlunilu.

Sukkaniuttarneq Iditarod 1925-mi aallartinneqarpoq. Illoqarfimmi Nomemi ingammik meeqqat sakkortuumik naarlullutik taamani nappaalasimapput. Timmisartortoqarsinnaanngimmat, Inuppiat meerartaat annaassinnaajumallugit akiuussutissanik qimussimik pajunneqarnissaat taamani aalajangiunneqarpoq. Qimussit arlallit taamani angalaqataapput. Qimussit akiuussutissanik usisut qimmimik Balto-mik ittoqutillit siulliullutik apuupput. Qimmeq taanna sapiitsuliortutut isigineqarluni New Yorkimi maanna eqqaassutissaqarpoq.

Sukkaniuttut aqqutissaanniipput isiginnaartut, nalliuttorsiuutigalutik qimmit saneqqutileraangata nilliallutik qiimmassaasartut. Timmisartuaraatillit sukkaniuttunik aamma malinnaapput, ilaat ajutoortoqarnissaanut sillimaniarlutik uumasut nakorsaanik ilaasoqartarlutik.

Sukkaniunnersuarmi unammeqataasut ilaat apuffissaminnut apuutinngitsoortarput, apuuttussalli ullut qulingiluat imaluunnit 17-it ingerlaareerunik Nomemut apuuttussaassapput.