Nunarsuarmi inuit coronavirusimik tunillanneqarsimasut 100 millionit sinneraat

Nunarsuarmi inuit coronavirusimik maannamut tunillanneqarsimasut marlunngornermi 100 millionit sinnerpaat, taakkunanngalu 2.150.000-t toqusimallutik.

USA-mi ilisimatusarfiup Johns Hopkins Universityp nalunaarsugaasa tamanna takutippaa.

Tunillanneqarsimasutut nalunaarsorneqarsimasut sisamararterutaasa missaat USA-mi nassaassaapput, USA-mimi maannamut tunillanneqarsimasut katillutik 25,3 millioniummata. USA-mi innuttaasut 330 millionit missaanniipput.

Indiami inuit coronavirusimik tunillanneqarsimasut 10,7 millioningajaapput.

Brasilia normu 3-tut matumani inissisimavoq, Brasiliamimi inuit 8,9 milllioningajaat tunillanneqarsimammata.

AAMMA ATUARUK Nunarsuarmi inuit coronavirusimik tunillanneqarsimasut 60 millionit sinneraat

Coronavirusimik Kinap avataani tunillanneqarsimasoq siulleq qaammatit aqqaneq-marluk matuma siorna siumorneqarpoq, tassa siullermik Europami kingornalu USA-mi siumuisoqarami.

Coronavirusip nunani tamalaani siunissami qaninnermi suli tuniluunnissaa aamma ilimagisariaqarpoq.

Coronavirusimimmi tunillanneqarsimasut amerliartortuarsinnartut nunat arlallit nalunaarutigaat, nunallu assigiinngitsut matuissimanngikkunik ilaannakortumik suli matusimallutik.

Coronavirusip allanngornerata tuniluutilertunnginnissaa pillugu nunat ataasiakkaat taamaaliorput, peqqinnissaqarfiit artukkerneqannginnissaat aamma siunertaalluni.