Nunarsuarmi aningaasarsiorneq 1930-kkunnili aatsaat taama ajornartoorfigitigissangatinneqartoq
Nunat siuarsagassat taarsigassarsiniartarfiat IMF taama missingersuuteqarpoq.
Nunarsuarmi aningaasarsiorneq ataatsimut isigalugu 2020-mi 3 procentinik annikillissasoq IMF-ip nalilerpaa. Nunarsuarmi aningaasarsiornerup ukioq manna 3,3 procentinik annertuseriarnissaa, IMF-ip qaammatit pingasut matuma siornatigut nalileraluarpaa.
Annaasat katillugit 62.000 milliardit koruuniussangatikkaat
IMF-ip ukioq mannamut maanna missingersuutaa eqquutsissappat ukioq manna aningaasarsiorneq 1920-kkunnut 1930-kkunnullu naleqqiullugu aatsaat taama ajornartoorfigitigissaaq.
Naak aningaasarsiornerup aappaagu 2021-mi ilorraallannissaa naatsorsuutigineqaraluartoq, ukioq manna ajornartoornermi annaasat 9000 milliardit dollariunissaat, tassa 62.000 milliardit koruuniunissaat eqqoriarneqarpoq. Allatulluunniit oqaatigalugu Tysklandip Japanillu ukiup ataatsip ingerlanerani aningaasarsiornerattut annaasaqartoqassaaq.
