Nunarsuaq tamakkerluni atuartoqarfiusoq
Atuagaq ilinniagaqarnissamut tunngatillugu nunarsuaq tamakkerlugu paasisitsiniaaneruvoq, taanna ilaatigut Danmarkimi nunanut ineriartortunut suliniaqatigiiffiup IBIS-ip suleqataaffigaa.
Danmarkimi atuartunut 190.000-inut atuagaq LæseRaketten agguaanneqareerpoq, atuartunullu kalaaliaqqanut ullumikkut agguaanneqassalluni.
Matumani pineqarluni meeqqat nunarsuarmiut tamarmik ilinniagaqarnissamut periarfissaqarnissaasa pingaaruteqassusia. Aasarulu nunarsuaq tamakkerlugu Sydafrikami arsaannermik pissartanngorniuttoqartussaanera pissutigalugu oqaasinnaarineqartoq tassaalluni "Atuarfik ajuuffimmut isertiguk".
Taamaattumik atuagaq nutaaq arsaannermut tunngasorpassuarnik atuagassartaqarlunilu assitaqarpoq.
Taamatut paasisitsiniaaneq arsaannermi Danmarkimi nunanut allanut unammisartunit, aamma arsaattartunit nunarsuaq tamakkerlugu tusaamasanit, soorlu makkunannga, tapersersorneqarpoq, Thierry Henry, Zinedine Zidane, Sir Bobby Charlton aamma arsaattartut klubbiannit FC Barcelonamit.
Nunarsuatsinni meeqqat tamarmik atuartuunissamut periarfissaqarnissaat siunertarineqarpoq.
- Meeqqat 72 millionit atuartuunissaminnut manna tikillugu periarfissaqanngillat. Nunarsuatsinni naalakkersuisut assigiinngitsut aningaaserivinnut ajutoortunut annaassiniarlutik ukiuni kingullerni aningaasaliissutigisartagaasa 0,2 procentii atorlugit nunarsuatsinni meeqqat tamarmik atualernissaat anguneqarsinnaavoq, Helle Gudmandsen IBIS-imeersoq taama oqarpoq. Taassuma neriuutigaa atuagaq nutaaq kalaallit meerartaanit ilassilluarneqassasoq.
