Nunarput tamakkerlugu qinersineq ammarneqareerpoq
Sapaatit akunneri pingasut matuma siorna qinersisinnaatitaasut 70%-ii qinersiartorput, ullumikkullu taama amerlatigisut qinersinissaat immaqa ilimanarpallaanngilaq. Illoqarfiit pingaarnersaanni Nuummi kommunimut qinersinermi kingullermi innuttaasut marluugaangata ataaseq qinersivoq, nunarpullu tamaat eqqarsaatigissagutsigu ilagiit sinniisaannut qinersinermi innuttaasut tallimaagaangata ataaseq qinersisimalluni.
Inatsisartunut qinersinerup inerneri aallaavigalugit Siumut kommunimut qinersinermi angusarissaartussatut aamma ilimanaateqarpoq, kommuninili sisamaasuni borgmesterit taarserneqarnissaat ilimanarpallaanngilaq. Jess Svane, Herman Berthelsen aamma Simon Simonsen tamarmik Siumumeersut ukiuni tullerni sisamani ingerlaannartussatut isikkoqarput, Kommuneqarfik Sermersuumilu IA marsip 12-iani ima qinigaalluartigaaq qinigaaffiup tulliani Asii Chemnitz Naarupip ingerlaannarnissaa ilimarnarluni.
Qinersineq ullup ingerlanerani malinnaaffigissavarput. Qinersiartoreersimaguit assiliisimallutillu, assimik nassiunissannut iluassagaluarpoq, taamaasilluta qinersineq nuna tamakkerlugu tamakkiinerusumik malinnaaffigisinnaaniassagatsigu. Assimik uunga nassiussisinnaavutit pet@knr.gl.
