Nunarput pillugu operaliaq immiunneqalersoq
Operaliarli maanna saqqummeqqinniarneqalerpoq. Saqqumeeqqinnialersoq tassaavoq nipilersortunik operartunillu aqutsisartoq Niels Borksand, erinniarsuarnik isiginnaagassianillu nunatsinni takutitseqataasarsimaneri akunnitsinni tusaamasaasutigalugit.
- Ujarak qajartorluni puisersuarmik naalittoq takussavarput. Taava ilisiittup Tulugartap paniata Annungap serranera Ujaqqap tusarneralugu kajungerinnilermat ilisiittut qeqertaannut nunnippoq. Taannaqami ilisiittut mamaqaarmik erinarsuutigalutik iggattuatsianngorput. Annungalli Ujarak saassuppaa qungasiatigullu kiillugu, uffa Ujarak tuppallersimaarluni ima erinarsussaqqaartoq: "Iviangernik aatsaat taama kusanartigisunik takunarmigami", Niels Borksand suleqatitsinnut Martine Lind Krebsimut oqaluttuarpoq.
Taama nunatsinni nakorsaasimasup C.M. Normann-Hansenip taalliaani Kattaarami ilaatigut pisoqarpoq. Operap erinartaanik suliarinnittoq tassaavoq erinniortoq Hakon Børresen. Operaliaq Kattaara 1921-mi saqqummeqqaarmat annertusimaqaaq, kalaallisuummi nunatsinneersut atorneqarput isiginnaartitsivimmilu qullilersueriaaseq taamani nutaaliaaqisoq atorneqarsimalluni. Ilaatigummi operarnerup nalaani qulliit arsarnertut isikkoqalersinneqarsinnaasimammata alutorineqarsimaqaat:
- 1921-imimi Kalaallit nunaat ungaseqaluni qallunaat takornartaarisuuaat, amerlanerillu Kalaallit Nunaat pillugu ilisimasaqanngerluinnarlutik, Niels Borksand oqarpoq.
Operap taallai qallunaatuinnaq allanneqarsimapput, kalaallisullu oqaatsit ikittuinnaat ilanngussuunneqarsimanerisa saniatigut qilaatersortoqarpoq. Operaliarli europamiunut tulluarsagaanera Niels Borksandip qularisassaannginnerarpaa:
- Taalliortup Kalallit, Kalaallillu Nunaat qanorluunniit asattuulluinnarlugit ilisimatigigaluarunigit taamani qallunaat kalaallinut isiginnittariaasiat atorlugu operap sananeqarsimanera malunnaqaaq. Børresenimi europamiut periaasaat atorlugu operap erinartai suliarai. Kisiannili qallunaat erinniornerup oqaluttuarisaaneranut ataqqinnittumik operaliaq suliarineqarmat, atortussat tamarmik, aamma atisat, Kalaallit Nunaanni sanaartortinneqarnissaat akissaqartinneqarsimapput. Tassa opera suliarineqarnialermat sunnguamilluunniit sipaarniartoqarsimanngilaq.
Erinnanik immiussinissaq Børresenip suliaasa nalunaarsorneqarnerinut ilaavoq, aningaasaateqarfiullu Erinniortup Hakon Børresenip nuliatalu Anna Børresenip aningaasaliinerisigut suliaq piviusunngortinneqarsinnaanngorpoq. Erinniortup Børresenip erinniaani Kattaarap erinartai kisiartaallutik immiussaatigineqanngillat. Operap immiunneqarnissaanut 360.000 koruuninik aningaasaliiffigineqarpoq, taakkulu qallunaat nipilersoqatigiivinut naammanngerluinnarlutik.
Taamaariarmat Bulgariami nipilersoqatigiissuit atorneqassapput, Bulgariarmiummi nipilersortartut 71-it ulluni qulini aningaasaliussat atorlugit attartorneqarsinnaapput, massa aningaasat taakkorpiaat qallunaat nipilersortartuinut nalunaaquttap akunneri pingasuinnarnut naammassaqqaartut Niels Borksand taama naggasiivoq.
..
Operap Kattaara-p immiunneqarnerata saniatigut Bulgariap illoqarfiisa ilaani Ruse-mi aggustip 26-iani tusarnaartitsissutigineqassaaq, Kongelige Teaterimilu erinarsullammaat marluk, tassaasut Stig Fogh Andersen aamma Gitta-Maria Sjöberg erinarsortorineqassallutik.
