Nunarput pilerinartunngorniarlugu Facebook atorneqalissaaq
Kalaallit Nunaata nunanut allanut tuniniaanini annertusaleruniuk, nutaarluinnarmik periuseqartariaqassaaq. Nunanut allanut pisortaqarfiup allaffimmi pisortaa Mininnguaq Kleist taama oqarpoq. Qarasaasiatigut attaveqarfiit assigiinngitsut inuinnarnik atorneqartartut aqqutigalugit, nunanut allanut tuniniaaneq annertusarniarneqarpoq.
- Internetikkut periarfissat misissorluarneqarnissaat isumassarsiaavoq, ilaatigut Facebook taassaumalu assigisaat misissorluarneqassasut taakkulu qanoq atugaatiginissaat misissorneqassalluni.
Mininnguaq Kleist taama oqarpoq.
Sapaatip akunnerata kingulliup ingerlanerani, nunatta nunanut allanut nittarsaanneqartarnera pillugu suleqatigiit naapisimaarput ukuusut; Nunanut allanut pisortaqarfik, Nunatsinni Takornariaqarnermi Inuussutissarsiornermilu Siunnersuisoqatigiit, GTE, Royal Greenland aamma Air Greenland, aamma nunat suleqatigineqartut isumasioqatigiinnermi peqataapput ukuusut: USA, Tuluit Nunaat aamma Tyskland peqatigalugit.
Qarasaasiat aqqutigalugit inuinnaat naapittarfii ilaatigut Facebook, Twitter aamma Youtube atorlugit nunatta avammut nittarsaannissaa isumassarsiaavoq atorluarneqarsinmnaasoq, Mininnguaq Kleist oqarpoq.
- Isumassarsiat nutaat taakku soqutiginartut ineriartortinnissaat sulissutigissavarput, qanorli inerneqassanersut massakkut oqaatigisinnaanngikkallarpara. Mininnguaq Kleist oqarpoq.
Anguniarneqarpoq nunarsuatsinni inuinnaat Kalaallit Nunaannut ilisimasaqalernissaat.
- Nunatsinnut tikeraajusinnaasut soqutiginaateqarput, taassumali saniatigut suliffeqarfiit nittarsaaffigineqarnissaat soqutiginerullugit sulissutiginiarparput.
Mininnguaq Kleist naggsiivoq.