Nunarput oqaatsimik ataatsimilluunniit eqqaanngilaa
Suliniutit angisuut pillugit inatsit Danmarkimi decembarip ingerlanerani oqallisaangaatsiarpoq oqallinnerlu taanna suli naaqqajanngilaq. Taamattoq statstministerip ukiortaami oqalugiaataani nunarput eqqaaneqanngilaq.
Illuanilli aningaasarsiornikkut ajornartorsiorneq anigorniarlugu Danmarkimi inuiaqatigiit ataatsimoornissaat kaammattuutigaa ajornartorsiornermi suliffippassuit annaaneqareermata. Danmarkimilu naalakkersuisut maanna misissuleruttorpaat ajornartorsiorneq qanoq anigorsinnaanerlugu. Ajornartorsiornermi qallunaat suliffeqarfiutaasa unammillersinnaassusaat avataaniit sunnerneqangaatsiarpoq.
- Ukiorpassuarni aamma taamaattuarumaarpoq. Unali eqqaamaneqassaaq: Silarsuaq allanngoraluarpalluunniit ataatsimoornerput nukittunerujuassaaq, Helle Thorning Schmidt ukiortaami oqalugiaammini statsministeriaqarfimmi pisumi oqarpoq.