Nunarput nammineq saliisalerusuppoq
Nunatta imartaani ukiuni kingullerni marlunni uuliasiorluni qillerinernit iluatsitsiviunngikkaluartut, uuliamik ujarlerneq ukiuni tulliuttuni annerulissasoq, Naalakkersuisut naatsorsuutigaat.
Tassalu taamaammat uuliamik maqisoortoqartillugu immikkut ilisimasalinnik nunani allaneersunik pisariaqartitsineq millisarniarlugu, suliffeqarfimmik nunamut tamarmut atuuttumik, uuliamik saliinermik suliaqartussamik pilersitsisoqarniarlerpoq.
Tamanna inatsisissatut siunnersuummi, Aatsitassanut Ikummatissanullu Pisortaqarfiup tusarniutigalugu nassiussaani atuarneqarsinnaavoq. Tassani ersippoq, uuliasioqatigiiffissuit nunani tamalaaneersut Nunatsini uuliasiussatillutik Namminersorlutik Oqartussat suliffeqarfiutaat akilertassagaat, taanna uuliakoortoqaratarsinnaaneranut avatangiisillu mingutsineqaratarsinaanerannut piareersimasooqqullugu.
Nammiersorlutik Oqartussat suliffeqarfiutissaat ateqassaaq "Greenland Oil Spill Response", aallaqqaatanilu tamakkiisumik sullissisinnaassanani, taamaallaalli
upalungaarsimanermi atortussanik neqerooruteqarsinnassalluni. Atortussat taakkua Cairn Energyp Namminersorlutik Oqartussanik isumaqatigiissutit naapertorlugu nunatsinnut tunissutigaat.
Siunertaavorlu, suliffeqarfiup atortussaatini, soorlu angallatit, imerpalasut siaruatsaaliornissaannut assiaquttat puttasartut, akuutissat mingutsitsinermilu atortussat allat piffissap ingerlanerani amerliartuaartissagai, tassalu uuliamik mingutsitsinerit Namminerlutik Oqartussat suliffeqarfiutaata kisimiilluni piffissami suli aalajangigaanngitsumi passussinnalissagai, inatsisissatut siunnersuummi atuarneqarsinnaavoq.
Cairn Energyp uuliasorluni siorna qillerinissaminut atatillugu upalungaarsimanermut pilersaarutaa akuerisaasoq arlalinnit isumakulunnartoqartinneqarpoq.
Tassami uuliamik aniarujussuartoqalissagaluarpat, saliinermi atortussat Tuluit Nunaata kujataani Southamptonimiit aatsaat timmisartuunneqaqqaartussaammata. Tassalu akuutissat, atortussat sulisullu uuliamik mingutsitsisoqarneranit nalunaaquttap akunneri 72-it qangiutereersut aatsaat apuuttussaallutik.
Kisianni kalaallit suliffeqarfiutissat upalungaatitsimanermut piareersimasussatut naammaginartumik qaqugorpiaq piareersimalissanersoq, inatsisissatut siunnersuummi allaaserineqanngilaq.
Suliffeqarfiulli qaqugu namminersortunngortinneqarnissaa erseqqilluinnarpoq. Tassalu piginneqataassutit kittaarlugit tuniniarneqassapput, piginneqatigiiffik Namminersorluni Oqartussanit 2020-mi piginneqataaffigineqarunnaavinnissaa tikillugu.
Tusarniaatigineqartumi aamma atuarneqarsinnaavoq, Greenland Oil Spill Response nunatsinni uuliasiornermi ajutoornernik suliarinnissinnaanermi saniatigut aamma issittup sinnerani suliarinninnissaassasoq.
Tusarniaaneq februaarip 17-anut killeqarpoq.
