Nunarput Mexicomisut pisoqarfioqqunngilaat
Atortut isumannaallisaanermullu piumasaqaatit BP-p atorsimasaat, Naalakkersuisunut ilinniutaasimaneramik maanna uuliamik misiliilluni qillerisoqarnissaanik akuersipput.
Kalaallit Nunaata kitaani immami ikkattumi misiliilluni qillerisoqartussaavoq, tassa 300 meterit 500 meterillu akornanni itissusilimmi. Uuliaqarpalli uulia 3 kilometerit 4 kilometerillu akornanni immap naqqata ataaniippoq.
Mexicop kangerliumarngani imaani 1.500 meterit angullugit ititigisumi qillerisoqarpoq, uulialu qallorniagaq 6 kilometerit angullugit immap naqqata ataaniilluni.
Naalakkersuisut isumannaallisaanermut piumasaqaataat BP-mut naleqqiullugit sakkortunerupput: Qillerut ataaseq ventiilinik arlalinnik nammineq matusinnaasunik peqassaaq aammalu qillerivimmiit aqunneqarsinnaassallutik. Mexicop kangerliumarnani ventiili ataasiinnaq atorneqarsimavoq, itivallaamilu qillerisoqarnerani ventiili taanna nammineq matusinnaasimanani aammalu qillerivimmiit taanna aqunneqarsinnaasimanani.
Cairn Energy marlunnik qilleriveqassaaq umiarsuarnik aqqanilinnik paaqqutarineqartunik. Uuliamik maqisoornermi imaluunniit ikuallattoqarnerani umiarsuit sillimasussaapput, ajutoornermit 10 minuttit iluanni qillerivinnut anngussinnaassallutik.
Ilulissat kangerluannit iluliarsuit aniasut qillerivik qaninnguussappassuk umiarsuit tallimat piareersimassapput iluliarsuit kalillugit avaqqutsinneqarnissaannut. Kalaallit Nunaata sineriaani allaniit ilulissat tissukartut ajornartorsiutaanissaat naatsorsuutigineqanngilaq.
Uuliamik maqisoornerup akiornissaanut atortut Aasianniissapput aammalu Tuluit Nunaata kujataaniissallutik. Atortut Tuluit Nunaanniittut 36 tiimit ingerlaneranni qillerivimmut angussinnaasut naatsorsuutigineqarpoq.
Misiliilluni qillerinissat aasap qaammataanni pisussaapput ukiaru sikulerpat qaammatit marluk sioqqullugit unitsinneqassallutik.
Naatsorsuutigineqarpoq uulia gassilu nappartat 17.000 millionit Baffinip kangerliumanersuani nassaassaasut. Kalaallit Nunaata sineriaani uulia gassilu nappartat 50 milliardit nalingi nassaassaasut naatsorsuutigineqarluni.
