Nunarput maligassatut atorpaat
Kangerlussuup timaani sermersuaq takuniarpaat, nunaqarfiit arlallit tikeraarpaat, aalisarsiartput nunarpullu pillugu qanga siunissamilu pissutsit tusagaqarfigaat. Taamaammat angalasasut Sisimiuniit aallarput misigisat ilisimasallu nutaat nassataralugit.
- Oqaluttuuppavut kommunimi maani qanoq suleriaaseqarnerluta qularinngilaralu peqataasut atorsinnaasaminnik Kalaallit Nunaat pillugu nutaanik ilisimasaqalersut qinnuteqaatit misissuataaraangamikkit atorsinnaasaminnik. Nunani tamalaani aningaasaateqarfiit attaveqarfigillattaajuarpagut maannalu aningaasaateqarfiit arfineq marluk tikeraareermata tamanna qinnuteqaatinut ajornasaarnerulernermik kinguneqarnavianngilaq. Aningaasaliinissamik ilimasaarneqanngikkaluarpugut tamannami aamma siunertaanngimmat. Kisianni aalajangiisartut kiinnerfigaagut, Qeqqata Kommuniani borgmesteri Hermann Berthelsen oqarpoq.
Tikeraarnermi aningaasaateqarfiit, Canada-miit, Schweizimiit, USA-miit, Ruslandimiit Danmarkimiillu peqataapput. Tamanna piviusunngorpoq Kuupik Vandersee Kleistip aamma Maliina Abelsenip Arne Villumsen Villum Fonden-imeersoq Københavnimi ataatsimeeqatigereeraat. Tikeraat issittumi pingaartumillu Nunatsinni pissutsinik oqaluttuunneqarput. Ilisimasassarsiorluni angalanikkut Nunatsinnut suleqarnerup siunissami ingerlaannarnissaa qulakkeerniarneqarpoq.
- Taamatut suleriarnermi Kalaallit Nunaat issittumi nunat allat ilinniarfigisinaanngorpaat. Nuna taanna kommuninut agguataarinermi naalakkersuisoqarnermilu immikkuullarissuteqarpoq Kalaallit Nunaannilu issittumi nunat USA-mut Canadamullu atasut sanilliutissagaanni kalaallit siuarsimanerupput. Ilisimalikkat Kalaallit Nunaanni pissarsiat issittumi nunat allat ilinniarfigisinnaalluarpaat, Arne Villumsen aningaasaateqarfiit Nunatsinni tikeraarneranni aqutsisoq oqarpoq.